Riba 30 di januari, Partido Patriotico Arubano (PPA) a manda un carta formal na Presidente di Parlamento, solicitando un sesion pa trata e trayecto di Rijkswet. Ta te shete, casi ocho luna despues, a duna oido. Na lugar di atende e reuion aki segun nos Reglamento di Ordo, a opta pa bay contra tur ley y keda sin yama e reunion publico aki.
PPA a tuma liderasgo
Keda keto, no tuma iniciativa y djis wak con algun ta dispuesto pa entre un lucha di nos antepasadonan, a pone cu fraccion di PPA a organisa ronda di consulta cu e gremionan comercial, sindical y diferente instancia. Esaki a sosode den e lunanan di juni, juli y augustus, unda cu den un sesion hopi interactivo, a scucha e puntonan di preocupacion di cada un.
“Ora cu nos a mira cu Gobierno y coalicion ta preparando pa bay Hulanda pa IPKO ,sin un solo momento a consulta e instancianan local, PPA a actua inmediato. Nos a presenta un Nota di Minoria y a compartie tanto cu e fraccionnan na Hulanda como cu tur instancia relevante na Aruba. PPA ta e unico partido, cu te awe, a pone su posicion cla y raspa riba papel tocante e Rijkswet HOFA,” segun lider di partido Otmar Oduber.
Gobierno ta mudo
Mientras cu algun otro partido a sigui e pasonan di PPA, e coalicion cu ta sostene gobierno a keda sin un posicion firme, sin dialogo y sin transparencia cu pueblo tocante e situacion real.
Via programa na Telaruba, PPA a duna e oportunidad pa un debate profundo y profesional, cu algun experto, uzando e base legal y constitucional, reafirmando cu PPA ta para pa un Frente Nacional. “Esaki no ta un asunto di PPA, AVP, MEP ni FUTURO, esaki ta un asunto di pueblo di Aruba,” Oduber a indica. El a adverti cu e lidernan actual ta bendiendo nos autonomia pa beneficio financiero y privilegio personal, traicionando e principionan moral y di lucha di nos antepasadonan, pa logra e libertad cu nos tin awe”.
Dos caminda: para hunto of entrega nos autonomia
Otmar a enfatisa cu e reunion di dialuna proximo, lo ta e di dos sesion di consulta cu e gremionan comercial, sindical y otro instancia relevante, cu Parlamentario Eduard Pieters di PPA a manda recientemente.
Durante e sesion aki, lo trata e dos camindanan pa Aruba den e caso di Rijkswet HOFA:
1. Parlamento di Aruba ta rechasa e ley y ta informa Hulanda cu no tin consensus, manera ta prescribi den e structura di Reino. Pa esaki tuma luga, mester tin un mayoria den Parlamento di Aruba.
2. Siguiendo e procedimento di Reino, Parlamento por elabora un “verslag” (informe) cu ta detaya e cambio y demanda cu Aruba kier propone pa protega su autonomia.
Pero pa PPA e posicion ta cla: “E ley aki mester para. Bo no por duna boso mes un ‘brevet van onvermogen’, cu ta un certificado di incapacidad como gobierno y Parlamento. Rijkswet HOFA ta corta e autonomia constitucional di Aruba y ta contradeci e esencia mes di nos Status den Reino,” segun Oduber.
Un ley inaceptabel
“Ta tur profesor y experto di Hulanda, incluso e miembronan di 1ste y 2de Kamer na Hulanda, a expresa cu Rijkswet HOFA ta algo inaceptabel y ta pone un menasa directo riba e autonomia di Aruba. Nan analisis ta confirma loke fraccion y partido PPA ta bin ta papia for di luna di januari.
HOFA ta algo inaceptabel y nan tur a indica claramente, cu e ley aki lo corta den nos independencia cu nos tin dentro di Reino pa loke ta trata nos autonomia. Tur loke nos a presenta dilanti pa e fraccion di gobierno, p’esey bo no ta scucha ni AVP ni FUTURO ta papia di e topico aki , pasobra e unico cos cu nan ta bisa ta, cu aworaki cu a entreg’e Parlamento su rol ta cuminsa pa por negosha y discuti ariba e topico aki., asina e gobierno no por keda mudo mas,” Oduber a bisa.
Den e momento crucial aki, PPA ta yama tur partido y ciudadano di Aruba pa uni forsa. Esaki ta un momento di tuma curashi, crea union y responsabilidad nacional. Esaki no ta politica! Esaki ta nos dignidad como pueblo. Aruba no por laga otro skirbi nos destino. Nos mester scoge dignidad riba dependencia.
Press release: PPA