Awe diputado Clark Abraham a hasi un seri di dokumento interno públiko, inkluyendo vários memo di Sekretario Insular i Gezaghèber, pa Konseho Insular i komunidat. E dokumentonan akí ta konfirmá klaramente ku konsekuentemente i boluntariamente el a ekskluí su mes for di e deliberashonnan i toma di desishon den Kolegio Ehekutivo relashoná ku kompra di e tereno di Industria Pisá na Santa Clara.
E inventarisashon interno ta mustra ku Kolegio Ehekutivo a reuní seis biaha tokante e punto di agènda aki, esta riba 5 i 12 di mart, 4 i 11 di yüni, i 3 i 5 di novèmber 2025. Na tur e okashonnan akí, diputado Abraham a hasi un apelashon riba e derecho di eksklushon i no a partisipá den e diskushonnan ni desishonnan.
E motibu pa e outo-eksklushon akí tabata relashoná ku e posibel aparensia di konflikto di interes debí na laso familiar ku doño di e tereno, kende ta defuntu.
“Mi maneho for di e promé dia tabata kompletamente di akuerdo ku e prinsipionan di e kódigo di integridat i e Reglamentu di Òrden di Kolegio Ehekutivo. Ta un alivio pa mi ku awor akí e echonan ta konfirmá esaki irefutabelmente, di manera ku por eliminá tur duda ku e akusashonnan sin base a sembra,” segun deklarashon di diputado Abraham.
Petishon pa Investigashon Independiente
Dia 10 di novèmber 2025 diputado Abraham a pidi Gezaghèber por eskrito pa inisiá un investigashon independiente i profundo di henter e proseso rònt di kompra di Santa Clara i e emishon di tereno na “Zandmannetje”. E ta yama bon biní na e anunsio resien di e investigashon akí di parti di Gezaghèber, i ku konfiansa e warda ta riba e resultadonan.
Violashon di Integridat i Pasonan Legal
Diputado Abraham ta ekspresá su desepshon tokante e táktika ku algun miembro di e Konseho Insular a usa pa hasi daño na su bon nòmber i honor. E ta enfatisá ku e akshonnan aki no solamente ta resultá den un atake personal baho sin ningun base, sino tambe nan ta en pugna ku e kódigo di kondukta i e gentle agreement ku lo mester ta vigente den Konseho Insular.
Kontra e personanan ku a hasi nan mes kulpabel di plama sugerensianan falsu i perhudisial tokante su integridat, diputado Abraham a tuma pasonan (legal) apropiá pa protehá su bon nòmber i e funshon públiko.
Diputado Abraham ta hasi un yamada pa un regreso na trankilidat den maneho i un kultura polítiko respetuoso, kaminda e enfoke ta riba sirbi Boneiru su interes general.
Press release: Gobièrnu di Boneiru