Lider di fraccion di MEP, Evelyn Wever-Croes, a expresa su preocupacion durante su discurso na Parlamento, unda e a indica cu, aunke pa hopi hende e finalisacion di e proceso di formacion por parce un motibo pa celebra, e realidad ta mustra un imagen totalmente diferente.
Segun Wever-Croes, durante e ocho luna nan largo cu gobierno ta estableci, lo cu a predomina no tabata alegria ni optimismo, sino “cara nan largo”, un ambiente cu e a describi mas como un belorio cu un celebracion.
E parlamentario tambe a lamenta e opinion negativo di Raad van Advies cu a wordo emiti riba e ley di LIM. A pesar cu Gobierno di Aruba a haya un dictum 4, segun Wever-Croes, e gabinete no a haci ningun ahuste na e cartera ministerial nan, loke a causa mas inkietud den Parlamento.
Wever-Croes a conclui su discurso enfatisando cu e situacion actual ta rekeri mas responsabilidad y transparencia for di gobierno, pa por restaura confianza y stabilidad den gobernacion di Aruba.