Representantenan di sindicatonan na Aruba ta sostene cu un acuerdo di negociacion no tabata definitivo y por wordo ahusta semper prome cu formalisa cualkier Rijkswet, incluyendo e propuesta di Rijkswet HOFA of no.
Den e debate actual riba Rijkswet HOFA, sindicatonan ta cuestiona e uzo di e termino “consensus Rijkswet”, señalando cu, no a existi un consenso real den Parlamento di Aruba.
Jose Figaroa, representante di Sindicatonan Uni, a splica cu tin un diferencia importante entre un Rijkswet regular y un consensus Rijkswet. Un consensus Rijkswet ta surgi for di acuerdonan entre paisnan dentro di Reino den e caso aki Aruba y Hulanda basa riba un deseo comun pa regula un asunto specifico y mester negosha riba esaki porehempel e“ Bestuurlijk akkoord mester a wordo negosha, pero e gobienro di AVP –FUTURO no a haci esaki.
Sinembargo, Figaroa ta enfatisa cu e consenso mester ta presente durante tur fase di e proceso legislativo. “E consenso mester existi di principio te fin,” el a indica, añadiendo cu segun nan evaluacion, esaki no a sosode den e proceso actual di Rijkswet HOFA.
E sindicatonan tambe a subraya cu un acuerdo alcansa durante negociacion no ta nifica cu e no por wordo revisa of modifica. Ainda tin espacio pa ahuste prome cu e ley wordo formalisa oficialmente y si e mester bira un Rijkswet mes.
E posicion aki ta refleha e preocupacion mas amplio den sector sindical riba e falta di participacion y consenso den e proceso, y ta fortalece e yamada pa mas dialogo entre tur partido involucra.
E discusion riba Rijkswet HOFA ta sigui desaroyando na Aruba, cu diferente actor social y politico ta pidi mayor transparencia, participacion y respet pa proceso democratico prome cu cualkier decision final wordo tuma.