Representantenan di sindicatonan ta enfatisa cu Aruba ta demostrando disciplina financiero y cumplimiento continuo cu su obligacionnan, tanto na nivel nacional como internacional, sin necesidad di implementacion di un Rijkswet manera HOFA.
Jose Figaroa, representante di sindicatonan Uni, a indica cu cifranan actual ta confirma cu Aruba semper a cumpli cu su pagonan na Hulanda y otro institucionnan. Segun Figaroa, e resultadonan aki ta evidencia claro cu e pais ta sigui e normanan establece y ta move den un direccion financiero positivo.
Figaroa a agrega cu e situacion actual mester sirbi como un momento di reflexion. El ta kere cu, mirando e progreso cu Aruba a logra sin presencia di un Rijkswet, ta valido cuestiona e necesidad di introduci un marco legal adicional riba e pais.
Segun sindicatonan, e proceso cu ta desaroyando actualmente mester wordo analisa cu cautela, ya cu nan ta considera cu Aruba tin capacidad pa maneha su finansas de forma responsabel sin intervencion adicional.
E declaracionnan aki ta forma parti di e discusion mas amplio riba autonomia financiero y e rol di Reino Hulandes den e gobernacion di Aruba.