E conflicto politico rond di e contrato multimiyonario di Aruba Tourism Authority (ATA) a pasa pa un otro nivel. Durante su conferencia semanal, parlamentario Eduard Pieters (PPA) a responde directamente na e declaracionnan di minister Cecilia, rechazando cu e preguntanan cu PPA ta haci lo por ta presenta como un intento di “criminalisa” Gobierno.
Pa Pieters, esaki ta net contrario: “Mi ta haci mi trabou como parlamentario. Criminalisacion ta ora un minister no ta mantene su mes na ley y ta evita di presenta e documentonan pa hustifica of contradeci su accionnan.”
Cu e declaracion ey, Pieters a cambia completamente e enfoke di e debate. PPA no ta acusando ningun persona di un acto criminal. Loke PPA ta exigi ta algo hopi mas basico: documentacion oficial cu ta demostra cu Gobierno a sigui e procedemento legal.
Carta oficial na Conseho di Minister
Pieters a confirma cu PPA oficialmente a manda un carta na Conseho di Minister, pa medio di minister-president Mike Eman, cu copia pa e minister concerni.
Segun Pieters, e carta ta concentra riba cuatro punto legal fundamental despues di e reunion publico cu Parlamento a tene tocante e contrato pa recogemento di desperdicio financia pa ATA.
“E carta no ta politica. E carta ta huridico.” Segun Pieters, durante e reunion parlamentario PPA finalmente a ricibi algun documento, incluyendo un contrato cu EcoTech y un “Request for Support”. Pero, segun e, ainda falta un documento esencial. “E prueba cu e procedemento obligatorio di destaho publico realmente a tuma lugar y e decreto ministerial (MB).
Unda ta e destaho publico ta?
Pieters a splica cu e preocupacion principal ta cu articulo 21 di e Landsverordening Instelling Aruba Tourism Authority ta obliga minister di turismo y ATA mantene su mes na e reglanan di destaho publico.
Segun e parlamentario, durante henter e debate, Gobierno no a presenta ningun evidencia cu e proceso obligatorio ey a wordo sigui. “Esey ta precisamente pakico Parlamento tin un funcion di control.”
PPA tambe ta pidi copia di e ‘ministeriele beschikking (MB)’ cu, segun Pieters, mester mustra oficialmente e instruccion cu minister a duna ATA conforme articulo 20 di e mesun ley.
“Nos no ta contra proyecto”
Despues cu Gobierno a expresa cu PPA ta purbando di para un proyecto positivo pa Aruba, Pieters a responde cu firmeza. “PPA no ta contra pa haci Aruba limpi! “PPA no ta contra e solucionnan pa desperdicio. PPA ta contra cu ta pasa riba ley.”
Segun Pieters, e rol constitucional di Parlamento no ta pa promove Gobierno, manera e 11 “cheerleaders” ta haci, sino verifica si Gobierno ta actua dentro di e marco legal.
“No ta placa di minister”
Pieters tambe a enfatisa repetidamente cu e fondo cu ta den discusion, no ta pertenece na ningun minister. “E 2.1 miyon florin no ta placa di minister. No ta placa di PPA. Ta placa di pueblo di Aruba.” Segun Pieters, precisamente pasobra ta trata di recurso publico, Parlamento tin obligacion di controla con ta gasta e placa denter di margen di ley. “Esey nos a huramenta p’e como parlamentario.”
“Bo no por bisa Parlamento ta criminalisa”
E punto mas fuerte di su reaccion tabata ora Pieters a contesta directamente e declaracionnan di Minister Cecilia. Segun e parlamentario, e minister ta tildando e preguntanan legal como un acto di “criminalisacion” y esey ta un intento peligroso pa desvia e debate.
“Mi no a acusa ningun hende. Mi a pidi documento.” Pero Pieters a agrega cu si un minister no por mustra cu el a sigui e ley, e critica no por ta presenta como un atake politico.
“Ora bo no ta mantene bo mes na ley, esey ta e berdadero problema. No e preguntanan cu Parlamento ta haci,” Pieters a sigui elabora.
No por sigui intimida Parlamento
Pieters tambe a lamenta e declaracionnan anterior haci di diferente minister cu ta bezig ta minimalisa Parlamento, describiendo e debate politico como “muchachada y co’i loco “.
Pa e lider di fraccion di PPA, e actitud ey ta debilita un di e institucionnan democratico mas importante di Aruba. “Parlamento no ta un obstaculo. Parlamento ta e institucion cu pueblo a scoge pa controla Gobierno.” Y segun Pieters, PPA lo sigui insisti riba documentacion, transparencia y cumplimento di ley. “Nos no ta busca confrontacion. Nos ta busca claridad. Y tanten cu e documentonan no ta riba mesa, nos lo sigui haci e preguntanan cu pueblo tin derecho di sa prome cu tuma e siguiente pasonan!” Eduard Pieters a finalisa bisando.