Un suceso violento a sacudi comunidad di Santa Cruz diaranson anochi, ora cu un tireo riba e parkeerplaats di stadion di Nadi Croes/Crismo Angela a laga un hoben gravemente herida. oranan despues, autoridadnan a confirma e noticia tristo cu e victima a fayece na hospital debi na su heridanan.
E incidente a tuma luga diaranson pa mas o menos 9:55 di anochi. Na e momento ey, central di polis a ricibi un melding urgente tocante un caso di tiramento na e sitio menciona y a despacha patruya policial hunto cu un ambulance cu maximo urgencia.
Na yegada di e prome unidadnan na e parkeerplaats, polis a bin topa cu un mucha homber benta abou, kende tabatin un herida di bala na su curpa y no tabata reaccionando. Personal di ambulance a duna asistencia medico na e sitio mes y a transporta e victima cu maximo urgencia pa Dr. Horacio E. Oduber Hospital. Pa facilitá e traslado aki, unidadnan policial a cera diferente caminda pa asina garantisa cu e ambulance por a yega hospital mas lihe posibel.
Detayenan preliminar di e investigacion
Segun e prome informacionnan cu a drenta na autoridadnan, e victima tabata riba un brommer hunto cu un otro persona riba e parkeerplaats. Na un cierto momento, un auto biniendo padilanti cu tres homber aden lo a los tiro riba nan, unda e hoben a keda alcansa pa un bala.
Debi na e gravedad di e suceso, Departamento di Recherche (Investigacion Criminal) y Departamento di BFTO (Forensico) a presenta na e sitio di inmediato pa cuminsa cu e recoleccion di prueba y investigacion forensico. Banda di esaki, a involucra tambe Departamento di Slachtofferhulp pa brinda sosten na esnan afecta pa e suceso aki.
Un rato despues di e incidente, autoridadnan a duna di conoce cu e victima a fayece pa motibo di e heridanan ricibi.
Polis a confirma oficialmente cu ta trata di e hoben Rayshon E. Kelly, naci na Aruba riba 1 di oktober 2009 y cu tabatin apenas 16 aña di edad. Cuerpo Policial Aruba ta manda nan mas sincero palabranan di condolencia na famia y sernan querido di e fayecido den e momento nan aki di hopi dolor.
Un Yamada na comunidad
E investigacion rond di e caso aki ta den pleno curso. Cuerpo Policial Aruba ta haci un apelacion fuerte na comunidad y na tur persona cu por tin cualkier informacion, of cu a wak algo sospechoso rond di e ora ey na Santa Cruz, pa tuma contacto cu e tiplijn di polis na 11141. Polis ta recorda cu bo ta keda completamente anonimo ora bo yama.