Plataforma Nacional Herencia di Sclavitud na Aruba (PNHSA), den un esfuerso coordina hunto cu organisacionnan similar na Corsou, St. Maarten y St. Eustatius, a entrega un carta conhunto na e parlamentonan di e islanan riba 6 di juli 2026. E accion aki ta marca un oposicion firme contra e intencion di Hulanda pa reintroduci e servicio militar obligatorio (“Dienstplicht”) pa e ciudadanonan den e Reino.
Rechaso pa decisionnan unilateral
Segun Sirelda Jackson, Presidente di PNHSA, e medida aki tin consecuencianan directo pa e hobennan na e islanan, tanto homber como muhe, debi cu e islanan ta forma parti di e Reino Hulandes. E fundacionnan ta para contra e forma cu Hulanda ta tuma e decisionnan aki di manera unilateral, sin consulta previo cu e pueblo di e islanan. PNHSA ta considera e militarisacion aki un peliger, ya cu e islanan ta biba den e Caribe como un “zona di paz,” un status cu nan kier keda mantene.
Acceso Digital pa Ciudadanonan
Pa garantisa cu e pueblo ta bon informa, e carta oficial entrega na Presidente di Parlamento di Aruba ta disponibel pa consulta publico. Shirley Caines, Vice-Presidente y Tesorero di PNHSA, a confirma cu tur ciudadano por lesa e documento aki via un sistema digital.
• E carta ta disponibel den Papiamento (di Aruba), Papiamento (di Corsou) y Ingles.
• Ciudadanonan por bishita e sitio web oficial: https://www.big6caribbean.org pa consulta e documento.
Caines a subraya cu e accion aki ta un muestra di unidad entre e cuater islanan, unda e organisacionnan ta monitoria e situacion di cerca y ta trahando hunto pa defende e interesnan di e Caribe, pa asina evita cu e islanan ta ser afecta pa maneho cu no ta cuadra cu nan realidad.
