Diaranson anochi, un suceso lamentabel a tuma luga den warda di polis na San Nicolas, caminda un detenido a fayece den su cel. Autoridadnan competente, incluyendo Landsrecherche, a drenta inmediatamente den un investigacion profundo pa determina e causa exacto di e morto.
Segun relato oficial di Cuerpo Policial Aruba (KPA), e descubrimento a wordo bishita pa mas o menos 8:20 di anochi durante un control rutinario di e celnan. Agentenan na turno a topa cu un detenido masculino cu no tabata reacciona.
Inmediatamente a raporta e situacion na e chef van dienst y a bati alarma na Central di Polis, cual a activa tur e protocolnan di rigor y a pone e autoridadnan competente na altura di e sucedido.
Pa via di e gravedad y e naturaleza di e caso caminda un persona ta fayece den un cel di detencion di Pais Aruba ,un cantidad grandi di autoridad a presenta na e sitio. Entre nan:
- E Hefe di Districto di Polis.
- Doctor forensico pa constata e morto.
- Personal di Polis Tecnico (Forensica) pa colecta evidencia.
- E departamento independiente di Landsrecherche, kende legalmente tin e encargo pa encabesa e investigacion ora un detenido fayece den cel.
E fayecido tabata un homber local, naci na Aruba, di 60 aña di edad. Te na e momentonan aki, Cuerpo Policial no a duna detaye publico riba e identidad di e persona, ni tampoco e motibo pa cual e tabata detene den warda.
Asistencia na famia: Personal di Departamento di Slachtofferhulp (Asistencia na Victimanan) tambe a acudi na e sitio pa brinda e sosten, guia y acompañamento necesario na e famia di e fayecido den e momentonan dificil aki.
E caso ta keda bou investigacion oficial. Cuerpo Policial Aruba a cera e informe mandando un palabra di profundo condolencia y forsa na e famia di e fayecido.