Parlamento di Aruba a yama un encuentro publico cu representantenan di sindicatonan, unda un total di 13 sindicato a presenta den Cas di Pueblo pa expresa nan preocupacionnan tocante e Rijkswet HOFA y su posibel impacto riba pais.
Durante e reunion, sindicatonan a comparti nan punto di bista y preocupacionnan relaciona cu supervision financiero y autodeterminacion di Aruba. E encuentro a forma parti di e dialogo continuo entre sector laboral y autoridadnan politico riba e legislacion propuesto.
Sinembargo, lider di fraccion di PPA, Eduard Pieters, a expresa su descontento cu e manera cu e reunion a wordo maneha, specialmente tocante e tempo asigna pa parlamentario nan pa formula pregunta. Segun Pieters, e decision pa limita e espacio pa pregunta na solamente cinco minuut no ta proporcional cu importancia di e tema cu tabata riba mesa.. pero e ta mas bien un acto di senura, sensura un pueblo.
El a indica cu un reunion cu tin implicacionnan asina serio pa futuro financiero y institucional di Aruba mester brinda suficiente oportunidad pa debate profundo y aclaracion di punto importante. Segun e lider politico, un proceso transparente y participativo ta esencial pa mantene confianza den institucionnan democratico.
E comentario di Pieters ta refleha preocupacion mas amplio den Parlamento riba necesidad di mas tempo y espacio pa discusion riba asunto cu tin impacto directo riba gobernacion, autonomia y stabilidad di pais.Na varios ocasion caba tin questionamento di e funcion di presidente di Parlamento cu no ta transparente, no ta democratico , pero mas bien ta cana paso di sensura y dictadura den parlamento.