PPA ta yama pueblo pa sigui Parlamento di cerca y uni riba tema di Rijkswet HOFA. Lider di fraccion di PPA, Eduard Pieters, a haci un llamado directo na pueblo di Aruba pa lanta, lanta for di soño, y sigui de cerca e reunionnan den Parlamento pa asina evalua ken realmente ta representa nan interesnan.
Segun Pieters, ciudadano nan mester presta atencion na e actuacion di e parlamentario nan cu nan a eligi pa defende nan interes. El a enfatisa cu sigui e reunionnan publico ta esencial pa mantene transparencia y responsabilidad den gobernacion di pais.
Durante e encuentro reciente den Parlamento, un total di 13 sindicato a presenta nan preocupacionnan riba e Rijkswet HOFA, splicando den detalle kico por ta e consecuencianan pa economia y pa cada hogar na Aruba. Segun lider di PPA, e tema tin impacto directo riba bida diario di ciudadano nan.
Pieters a critica e postura di ciertu fraccion politico, indicando cu tanto fraccion di AVP como di FUTURO no a formula pregunta durante e reunion. El a califica esaki como un señal di inmadurez politico den un debate cu tin implicacionnan amplio pa futuro di pais.
Fraccion di PPA a expresa cu nan lo sigui cu fe y balentia pa promove union nacional, invitando pueblo, sindicatonan y gremionan comercial pa traha hunto. Segun nan, un frente nacional unifica lo por demonstra na Hulanda cu Aruba ta cumpli cu su obligacionnan y ta maneha su finansas di manera responsable.
Ademas, Pieters a confirma cu el ta para tras di un forma di supervision financiero, incluyendo e concepto di un begrotingskamer, cual segun el por brinda control y transparencia sin compromete autonomia di Parlamento.
El a subraya cu e meta principal no ta pa crea division riba ken a firma acuerdo anterior, sino pa fortalece unidad nacional y enfoca riba situacion actual di pais. Segun dato menciona door di PPA, Aruba a logra reduci su debe publico significativamente, baha di aproximadamente 117% durante pandemia pa alrededor di 64% den poco añanan, cu un pronostico pa yega cerca di 50% na 2029.
Segun Pieters, e progreso financiero aki ta genera pregunta riba necesidad real di e Rijkswet HOFA. El a expresa preocupacion cu un ley asina por limita e derecho presupuestario di Aruba y transferi decisionnan financiero importante na nivel externo.
E declaracion di lider di PPA ta forma parti di e debate continuo riba autonomia financiero, responsabilidad fiscal y rol di Parlamento den determinacion di rumbo economico di Aruba.