Lider di fraccion di AVP ta referi na Bestuurlijk Akkoord y plazo establece pa introduccion di ley. Lider di fraccion di AVP, Jennifer Arends-Reyes, a indica cu mirando e preocupacionnan actual riba e Rijkswet HOFA cu ta riba mesa, ta importante pa reflexiona si den pasado tambe a bin cuestiona e proceso di otro rijkswetnan cu a wordo firma.
Segun Arends-Reyes, tin un Bestuurlijk Akkoord entre Aruba y Hulanda unda a wordo establece palabracionnan claro cu e Rijkswet HOFA mester yega prome cu 1 di Mei. El a subraya cu e acuerdo aki ta forma parti di e compromiso institucional cu gobierno a asumi den dialogo cu Reino Hulandes.
E lider di fraccion di AVP a reconoce cu sindicato nan a bolbe presenta nan posicion y preocupacionnan den Parlamento, loke segun el ta un paso importante den proceso democratico. Sinembargo, el a enfatisa cu pa fraccion di AVP ta esencial cu sindicato nan mantene e canal di comunicacion habri cu gobierno.
Segun Arends-Reyes, e punto principal ta cu dialogo continuo entre sindicato nan y gobierno ta fundamental pa aborda e inquietudnan existente y pa busca solucionnan den interes di pais. El a subraya cu cooperacion y comunicacion constructivo lo yuda fortalece confianza entre e diferente actor nan envolvi den e proceso.
E declaracion di lider di fraccion di AVP ta forma parti di e debate mas amplio riba e futuro di supervision financiero, autonomia nacional y relacion institucional entre Aruba y Hulanda.