Den un testimonio emocional y fuerte for di e medio Live 99 di Boneiro, un ciudadano Layonel Anthony a expresa su preocupacion pa e falta di respet y e trato desigual cu localnan ta ricibi den nan mesun pais den comparacion con nan mester comporta nan mes ora nan ta exterior.
Respet y Regla na Exterior
E ciudadano a comparti su experiencia bishitando Hulanda, destacando cu como bishitante, e mester a mantene su mes estrictamente na tur regla di e pais Hulanda. “Ora bo bishita cualkier pais rond mundo, bo tin cu respeta e pais ey,” el a enfatisa, señalando cu e mesun nivel di respet ey mester wordo exigi di esnan cu ta bishita nos islanan den Caribe.
Un punto di critica fundamental ta e forma con ta inverti den inversionnan cu no necesariamente ta beneficia e local di Boneiro directamente. El a menciona como ehempel e desaroyo di canchanan di beach tennis, caminda ta gasta hopi placa den santo, luz y awa, mientras cu deportenan practica pa localnan no ta haya e mesun sosten.
“Con nos Boneriano cu ta haci deporte no ta wordo yuda ni scucha?” e ciudadano a puntra. El a splica cu den su area, nan ta biba sin coriente y sin awa, teniendo cu depende riba generadornan, mientras otro proyectonan ta haya tur facilidad mesora.
Dificultad pa Adkiri Vivienda
E comparacion mas fuerte a bini ora di papia over di e facilidad pa cumpra cas. Segun e ciudadano, un local mester entrega un cantidad enorme di informacion personal y financiero na banco pa por bini na remarca pa un fiansa pa un cas, pero un hulandes europeo no, pa e Bonerianonan tur esaki nan ta modusnan di inhusticia tumando luga riba Boneiro.
Contrastando esaki, el a señala cu personanan cu ta bini for di Hulanda sa yega y cumpra casnan y inversionnan grandi mesora, hopi biaha sin mesun e exigencianan cu e local ta enfrenta. E sentimento general ta cu e local ta wordo poni un banda den su mesun cas, locual e ciudadano ta considera un situacion hopi penoso.