Minister di Finansa, Economia y Sector Primario, sr. Geoffrey Wever, a presenta formalmente e conseho di Raad van Advies (RvA) tocante e concepto di Rijkswet houdbare overheidsfinanciën Aruba (Rijkswet HOFA) na Parlamento di Aruba den un reunion cera. E documento aki, cu a keda ricibi dia 29 di april ultimo, ta contene advertencianan serio tocante e legalidad di e ley y e limitacion di autonomia di e isla.
E punto di mas controversia den e conseho di RvA ta e asina yama Articulo 38 di e ley di Reino. Segun e organo consultativo, e articulo aki ta “fundamentalmente den contra di e Staatsregeling di Aruba”. Articulo 38 ta prescribi cu Gobierno di Aruba no mag di cambia ni hala aden e ley nacional (LWHO) sin aprobacion previo di e Conseho di Minister di Reino (RMR).
RvA ta splica cu bou di e Staatsregeling, e potestad pa traha y cambia ley ta un derecho exclusivo di e Gobierno y Parlamento di Aruba hunto. “Gobierno no tin e autoridad pa pone condicionnan limitante riba e introduccion di leynan nacional cu ta desvia di e Staatsregeling,” e conseho ta subraya, refiriendo na e principio legal di nemo-plus.
Falta di tempo y transparencia
Fuera di e base legal, RvA a expresa su masha decepcion riba e forma con e proceso a cana:
- Sin tempo pa conseho: E peticion pa conseho a wordo ricibi dia 9 di maart, mientrastanto e decisionnan caba a wordo tuma den RMR dia 6 di maart. Esaki a nifica cu Aruba no por a uza e puntonan di e conseho durante e negociacionnan crucial na Hulanda.
- Incerteza financiero: Aunke e Rijkswet ta habri porta pa interesnan mas abou riba e fiansanan di COVID (un spaar di mas cu 300 miyon florin den 20 aña), tin hopi duda ainda tocante e refinanciamento di debe exterior.
- Leynan incompleto: E ley nacional cu mester compaña e Rijkswet (LWHO) no ta “cla” ainda segun e organo, y falta feedback importante di Algemene Rekenkamer.
Recomendacionnan
Pa evita un conflicto constitucional, Raad van Advies ta recomenda pa scapa Articulo 38 completamente for di e ley. Como alternativa, nan ta propone pa pone e normanan financiero (manera e cifranan di IMF) directamente den e Rijkswet mes, locual lo haci e condicionnan mas transparente y legalmente mas solido pa tur dos banda di Ocean.
Awor ta keda na Parlamento pa debati e puntonan aki y dicidi si e “hybride constructie” aki di un ley di Reino mara na un ley nacional ta e caminda corecto pa e finansanan publico di Aruba.
Analisis Politico: Un Parlamento di “Bananenrepubliek”?
E critica awor ta wordo dirigi riba e miembronan di Parlamento di e fraccionnan di AVP y FUTURO. Maske tin hurista den nan filanan, ta parce cu un gran parti di e parlamentarionan (hopi di nan nobo) ta sigui e curso di gobierno ciegamente. Lamentablemente ta sostene e gobierno aki, cu tin un poco mas cu un aña sinta, y no ta para pa e principio nan di Aruba y defende autonomia na nomber di e pueblo di Aruba. E gobierno di AVP-FUTURO a ocasiona e daño di mas grandi na Aruba den henter e historia politico di e pais cu Rijkswet HOFA.
Raad van Advies ta confirma cu e rapport aki loke varios profesor y experto a demostra caba. Apesar di esaki, ta parce cu e parlamentarionan di e coalicion no ta tuma nan propio postura, sino nan ta fungi como “marioneta” di gobierno. E actitud aki ta wordo describi pa oponentenan como un “berguensa nacional”, caminda e parlamento ta wordo reduci na un organo sin su propio principionan, algo caracteristico di un “bananenrepubliek”.
