Bonaire Human Rights Organization (BHRO) ta sigui sigura cu e bos di Boneiro wordo scucha riba e escenario internacional.
Durante e di 13 Sesion di Mecanismo di Expertonan tocante Derecho di Desaroyo na e sede di Nacionnan Uni na New York, BHRO a haci cuater intervencion fuerte dilanti di e panel distingui di Nacionnan Uni y estadonan miembro, incluyendo Union Europeo y Hulanda.
Presidente di BHRO, Davika Bissessar Shaw, a dirigi e sesion, mientras cu fundado di BHRO, James Finies, a haci tres intervencion adicional durante dos dia, poniendo e preocupacionnan di Boneiro directamente dilanti di Nacionnan Uni.
James Finies, den su intervencionnan, a enfatisa cu berdadero desaroyo nunca no por existi caminda un pueblo ta wordo nega participacion completo den decisionnan cu ta afecta nan tera, identidad, cultura y futuro. El a adverti cu pueblonan chikito insular y pueblonan no-autonomo no mester keda atras den e agenda global di desaroyo.
Pa medio di e serie di intervencionnan aki, BHRO un biaha mas a demostra un lucha internacional persistente, sigurando cu e preocupacionnan di Boneiro tocante derecho humano, dignidad, igualdad y desaroyo ta keda firmemente registra den e salonnan di Nacionnan Uni.
Despues di añanan di neglegencia y ignorancia sistematico di e derechonan di Boneiro desde e restructuracion inconstitucional di 10-10-10, ministerionan hulandes, parlamentonan y institucionnan nacional y estatal ta wordo forsa cada biaha mas pa responde, drenta den dialogo, revisa maneho y inicia cambionan riba asuntonan cu nan a ignora pa hopi tempo.
Tur e cambionan cu awor ta tuma luga na Boneiro ta resultado directo di e intervencionnan di James Finies y BHRO na Nacionnan Uni y otro foronan internacional. Segun BHRO, e movimientonan aki no ta actonan di bon intencion, sino e reaccion forsa debi na e exposicion internacional sosteni di e crisis di derecho humano, gobernacion y autodeterminacion na Boneiro.