Un selebrashon di salú, mindfulness i bienestar, impulsá pa nos komunidat
Tourism Corporation Bonaire (TCB) ta invitá habitantenan i bishitantenan pa partisipá na un selebrashon ku ta dura un siman largu, yen di moveshon, mindfulness i bienestar holístiko, durante e Bonaire Yoga & Wellness Week 2026, ku ta tuma lugá for di 13 te ku 21 di yüni 2026. Bou di e lema “Tuma tempu pa bo bienestar”, e kampaña ta un simpel invitashon pa baha spit, hasi kontakto di nobo ku bo mes i duna prioridat na bienestar personal den bida diario.
Den kuadro di Dia Internashonal di Bienestar (13 di yüni) i Dia Internashonal di Yoga (21 di yüni), e inisiativa aki ta pone e komunidat kresiente di bienestar na Boneiru i e konekshon natural ku nos isla tin ku bida na aire liber, ku relahamentu i ku eksperensianan konsiente den spòtlait.
E kampaña su enfoke ta na promé lugá pa laga hendenan sera konosí ku e oferta amplio di aktividat di bienestar ku ya kaba ta tumando lugá na Boneiru. Di e manera akí bienestar ta bira mas aksesibel i na mes momentu visibilidat di empresarionan i empresanan di bienestar ku ta kontribuí aktivamente na e kultura di bienestar na nos isla, ta bira mas grandi.
Komo parti di su strategia mas amplio pa promové desaroyo sostenibel di produkto i pa mehorá eksperensia di bishitante, TCB ta sigui invertí den oferta di bienestar na henter nos isla. Enfoke di e esfuersonan akí ta pa fortifiká Boneiru su posishon komo destinashon prominente pa eksperensianan di biahe konsiente, basá riba naturalesa i restorashon.
Partisipá na e eksperensia akí
TCB ta invitá tur hende pa deskubrí nos isla a base di un otro perspektiva. E siman akí tin algu pa ofresé pa kada hende. Tuma tempu pa bo bienestar i eksperensiá Boneiru den su forma mas balansá.
Pa tur oferta i aktividat, bishitá: https://bonaireisland.com/wellness-week/
