mas cu 600 mucha di scolnan primario rond di Aruba lo sube escenario na Renaissance Convention Center pa e Concierto di Fin di Aña anual di Leerorkest Aruba.
E concierto aki ta marca e culminacion di un aña di educacion musical, trabou den ekipo y desaroyo personal. Alumnonan di diferente scol lo presenta un programa musical varia, unda nan lo demostra e progreso cu nan a logra a traves di e programa di Leerorkest Aruba.
Desde su fundacion na 2019, Leerorkest Aruba a brinda educacion musical gratuito na cientonan di mucha rond di e isla. A traves di lesnan semanal durante horario di scol, programanan di Leerorkest Despues di Scol (After School Orchestra) y educacion musical online, e muchanan ta haya e oportunidad di discubri nan talento, desaroya confiansa den nan mes y adkiri habilidadnan bital pa bida a traves di musica.
E concierto di e aña aki lo conta cu actuacion di alumnonan di Klas 3 te cu Klas 6, como tambe di e Leerorkest Despues di Scol. E programa ta inclui un variedad di seleccionnan musical internacional, caribense y local.
E director di orchestra invita specialmente for di Hulandes, Patrick de Heus, lo dirigi e orchestra durante e concierto. Patrick tin un amplio experiencia trahando cu musiconan moho a traves di e programa di Leerorkest na Hulanda, y e a pasa e siman aki ta train cu e alumnonan en preparacion pa e evento special aki.
E concierto aki lo no tabata posibel sin e dedicacion di e maestronan di musica, ekiponan di scol, boluntarionan, mayornan, sponsor- y partnernan cu ta sigui apoya e mision di Leerorkest Aruba.
Segun e coordinadora Juliette van Romondt, e concierto ta trata di hopi mas cu simplemente musica:
“Cada mucha merece e oportunidad di discubri su talentonan y experencia exito. A traves di musica, e muchanan ta siña confiansa, disciplina, trabou den ekipo y perseverancia. E concierto aki ta un celebracion di tur loke nan a logra durante e aña escolar.”
Detayes di e evento:
Fecha: Dialuna, 22 de juni 2026
Lugar: Renaissance Convention Center
Ora: 9:00 AM – 12:00 PM
Pa mas informacion tocante Leerorkest Aruba, por fabor bishita: www.leerorkestaruba.org
Tocante Leerorkest Aruba
Leerorkest Aruba ta un programa musical educativo sin fines de lucro cu ta brinda les di musica instrumental gratis na mucha rond di Aruba. Inspira pa e modelo exitoso di Leerorkest na Hulanda, e programa tin como meta pa haci educacion musical accesibel pa cada mucha, sin importa nan origen of situacion financiero.