Mientrastanto cu e panorama politico na Aruba ta sigui transforma, preocupacionnan serio ta lanta den comunidad tocante e falta di direccion di e gobierno actual. E introduccion y discusionnan rond di e Ley di Reino (Rijkswet HOFA) y e Ley Nacional (LWHO) a genera un ola di interogativo. Gran parti di e pueblo y analistanan ta critica e falta de transparencia di e lidernan politico, catalogando e situacion actual como un di e periodonan di mas debil den historia politico recien di e isla.
Incertidumbre rond di e futuro financiero y autonomia
Un di e puntonan di mas fuerte di critica ta dirigi riba e falta di informacion concreto y real tocante e impacto di e HOFA. E lidernan di e coalicion di gobierno no ta brindando claridad riba e fasetan final di e LWHO. Tin un cuestionamiento serio cu, si e ley aki pasa den Parlamento, e por limita formalmente e capacidad di e organo legislativo pa vocifera y dicidi riba presupuesto propio. Na momento cu e LWHO drenta na vigor, e ta crea un structura caminda decisionnan structural lo keda mara na condicionnan di e Rijkswet, restringiendo e ‘bevoegdheid’ (competencia) local te ora cu e cuadro legal ey caduca, un escenario cu, debi na e exigencianan actual, no ta mustra facil pa sali di dje.
Ta existi un temor legitimo den e sectornan economico cu e implementacion di e leynan aki por compromete e finanzas publico y, por lo tanto, e bienestar di e ciudadano comun. E falta di un comunicacion structura y asertivo pa cu e pueblo ta laga hopi di desea. Awe, 6 di juni 2026, despues di mas de un aña di gobernacion AVP-FUTURO, ainda no tin un Plan di Maneho y kico ta incera e Rijkswet HOFA y e LWHO, tambe e (LIM) formalmente no oficialisa, locual ta lanta interogativo legal riba e base di varios decision adopta. E falta di un plan formal ta wordo debati popularmente como un estado di desordo institucional. Parlamento, for di su banda, ta wordo cuestiona pa su falta di control fiscalizador, actuando den hopi ocasion simplemente como un organo di aprobacion pa e Ehecutivo.
Actuacion individual y controversia ministerial
E falta di un rumbo unifica ta bini dilanti den e manera cu e ministernan ta fungi den nan respectivo carteranan, expone pa decisionnan isola y controversianan publico:
• Minister Geoffrey Wever: Ta wordo cuestiona pa un campaña activo pa promove e producto HOFA, cual varios sector ta considera dañino pa e estabilidad financiero di e Arubiano. Ademas, e maneho di “Agri-enovation” ta ricibi critica pa supuestamente hala companianan y agricultornan local un banda pa habri caminda pa inversionistanan externo.Un biaha pa Hulanda riba refineria siendo cu e parti aki ta caoi bou di Minister Dowers
• Minister Gerlien Croes: Ta enfrenta critica severo den e seno politico pa su falta di experencia, frescura y su contesta riba preguntanan formal haci door di Parlamento tocante e polemica rond di su viahenan den un jet priva. Su mal desicino nan di cera un departamento di hoben y mucha sin un base. Como minister di enseñansa pa prome biaha den historia di Aruba su politica supuestamente tin un cantidad grandi di docentenan cu ta bandona veld di enseñansa.
• Mike Eman Prome Minister di Aruba :Mercadiano den barionan y ta wordo critica pa ehecuta un politica netamente populista den barionan, sin duna un alternativa real of un plan concreto pa enfrenta e HOFA y LWHO, sin asumi e rol di liderazgo legislativo cu e pais mester den e momentonan aki.
E debilidad mas grandi di e administracion actual ta e dinamica interno di e ministernan. Ta bisto cu tin un interposicion di funcionnan (un “cris-cros”) caminda ministernan ta interveni den carteranan di otro sin un coordinacion central for di e prome ministerio. E falta di consistencia aki unda un dia ta declara un postura y e siguiente dia ta actua di forma contrario ta debilita e confianza institucional. Pa hopi, e falta di cohesion aki ta duna e impresion di un gabinete inestable, sin un vision real a largo plazo pa Aruba.
E supuesto violacion di reglanan, e ignorancia di proceduranan administrativo y e falta di respet pa e leynan nacional ta hiba structuralmente na e conclusion cu Aruba ta enfrentando un di e administracionnan mas ineficiente den su historia democratico. Pa restaura e confiansa, e weganan politico y e falta di duna cuenta mester para, habriendo caminda pa un gobernacion serio, transparente y compromete cu su pueblo.