Den cuadro di e bishita di e delegacion parlamentario di Aruba na Hulanda, Parlamentario Shailiny Tromp-Lee a duna un evaluacion positivo riba e reunionnan cu a tuma luga cu miembronan di Raad van State. Segun Tromp-Lee, e resultadonan di e ultimo conseho publica pa e organo aki ta cuadra perfectamente cu e posicion cu fraccion di MEP y coalicion a bin ta sostene den e debate legal y constitucional.
Tromp-Lee a cuminsa pa expresa su satisfaccion total cu e recepcion y e nivel di e reunionnan na Den Haag. “Nos ta hopi satisfecho cu e reunion cu nos a sostene cu e miembronan di Raad van State, e parlamentario a declara, indicando cu e encuentro a sirbi pa duna un claridad formal riba e asuntonan di mas peso cu tin den discusion entre Aruba y Hulanda.
Pa e parlamentario, e punto central di e conseho nobo ta cu e ta ratifica legalmente cu e fiansa y e condicionnan presenta door di Hulanda via e Rijkswet ta hinca un limitacion directo den e autonomia financiero di Aruba.
Tromp-Lee a resalta cu esaki no ta un interpretacion personal, sino un conclusion structural cu ta duna rason na e preocupacionnan cu e pueblo y e partidonan na Aruba a bin ta vocifera. “E conseho di Raad van State ta un confirmacion structural di locual nos como fraccion di MEP, hunto cu e coalicion, a bin ta boga p’e formalmente,” el a enfatisa.
“E conseho aki ta duna nos e base legal formal pa mustra cu e preocupacionnan di Aruba tabata y ta valido.
Un otro aspecto crucial cu Tromp-Lee a trece dilanti ta e falta di claridad tecnico tocante e refinanciamento di e fiansanan. Segun e parlamentario, e mesun organo consultativo (Raad van State) a duna di conoce cu den e documentonan presenta pa Hulanda no tin un specificacion cla ni obvio di cua fiansa structural lo wordo refinancia y cua no.
E falta di transparencia aki ta debilita e presentacion di cifranan cu a wordo haci anteriormente na Aruba pa e ministernan concerni, catalogando e base di e cifranan ey como incompleto debi cu e propio organo superior na Hulanda no tin e detaye ey formalisa ainda.
Finalmente, e parlamentario a lamenta cu algun medio di comunicacion, citando specificamente e portal Koningsrijksrelaties, a purba di desvia e atencion of a publica e conseho fuera di su contexto real, pretendiendo cu Raad van State no a mira un menasa pa e autonomia.
Tromp-Lee a confirma cu e delegacion di Aruba ta para uni den e defensa aki y a gradici e miembronan di Raad van State pa nan honestidad y pa e espacio habri pa clarifica tur e puntonan cardinal. Awor, segun el a conclui, e debate final lo mester wordo balansa y dicidi formalmente caminda e ta pertenece: den e seno di Parlamento di Aruba.
