Un baluarte riba e tereno cultural ta bay cu pensioen bon mereci!
Tabata un placer pa Parlamentario Xiomara Maduro compaña sr. Nelson Tiel pa celebra su ultimo dia di trabou na Archivo Nacional di Aruba (ANA). Rondona pa su coleganan y famianan, Nelson a recorda e hecho cu ela traha 44 aña na bienestar di nos comunidad, y e momento a yega pa bay cu un pensioen bon mereci.
Durante añanan Nelson a traha na Idefre, Departamento Social, y na ANA na unda Nelson a traha pa 23 aña largo.
Parlamentario Maduro ta masha gradici na Nelson particularmente pa tur trabou cu el a haci riba e tereno cultural pa conserva nos historia, por ehempel, pa medio di e diferente entrevista cu baluartenan cultural cu a keda graba y documenta pa historia. Sin lubida cu Nelson mes ta un baluarte cultural cu ta tene nos tradicion di musica di cah’i orgel na bida.
“Nos ta gradici Nelson pa tur locual el a haci pa documenta nos historia, y tambe pa tur su aporte na nos tradicion di musica di Cah’i Orgel. Disfruta di un pensioen bon mereci,” Parlamentario Xiomara Maduro ta expresa.
