Den fin di siman, un grupo di hoben a participa cu exito den e bootcamp di percusion di Gang di Arte. Durante tres dia intensivo, e participantenan a sera conoci cu diferente aspecto di percusion. Nan a siña e basenan di percusion y a profundisa nan conocemento riba structuranan di ritmo y diferente tecnica. E fin di siman a cera cu un presentacion pa famia y amigonan, caminda e participantenan por a mustra tur loke nan a siña. Segun lider di proyecto Damari Alonzo, e bootcamp a forma un prome paso importante den desaroyo di e grupo.
E bootcamp a wordo organisa pa ACE Foundation den colaboracion cu Fundashon Konstrui Awor i Mañan (KAIM), Entidad Publico Bonaire y Divi Flamingo. Bou di guia di Dr. Sandy Hato, kende tin hopi aña di experiencia y conocemento den mundo di percusion, e participantenan a ricibi lesnan teoretico y practico. Hato a wordo sostene pa coachnan cu tambe ta activo den e sector di percusion y cu a comparti nan experiencia y conocemento cu e participantenan.
“Mi ta hopi satisfecho con entusiasma e muchanan tabata. Mayornan, keda sostene nan pasobra nan tin hopi smak y tin hopi talento. Na esnan cu a haci e fin di siman posibel, keda duna boso aporte pasobra e muchanan kier y tin interes”, asina Sandy Hato a bisa riba e anochi final.
Riba e prome dia, e foke tabata riba conocemento mutuo y un introduccion na percusion. Riba e di dos dia, e grupo a traha riba structuranan di ritmo, profundisacion di tecnicanan y preparacion pa e presentacion final. E ultimo dia a enfoca riba ripiticion, practica y e presentacion final.
Lider di proyecto Damari Alonzo a splica cu, despues di e bootcamp, e grupo lo sigui traha riba desaroyo di nan habilidadnan: “E trabou berdadero ta bai cuminsa awor. E grupo lo enfoca riba perfecciona loke nan a siña y sigui amplia nan conocemento. Ora nan ta cla pa esaki, lo tin presentacionnan publico tambe”. ACE Foundation lo sigui tene comunidad informa tocante futuro actividadnan y presentacionnan di e grupo.
