Delegacionnan di Parlamento di Corsou, Aruba y Sint Maarten a yega na un Resolucion conhunto. Den e resolucion aki e tres delegacionnan ta expresa nan desacuerdo cu Reino Hulandes a abstene di vota na maart ultimo riba un resolucion di Nacionnan Uni, cu ta reconoce sclavitud como un crimen contra humanidad.
E delegacionnan ta lamenta cu Reino Hulandes a tuma su posicion tocante e topico aki sin consulta previo cu e tres paisnan den Reino. Esaki, a pesar di e importancia historico, social y moral directo cu esaki tin pa nan. Pa e motivo aki, e resolucion ta enfatisa cu e falta di consulta aki ta bolbe demostra un ‘deficit democratico’ structural den Reino, especialmente den asuntonan exterior cu ta afecta e paisnan Caribense directamente.
Durante e Consulta Interparlamentario di Reino (IPKO) na Den Haag, e tres delegacionnan, pa medio di nan Presidentenan di Parlamento, sr. Alfred Sneek (Aruba), sr. Fergino Brownbill (Corsou) y sra. Sarah Wescot-Williams (Sint Maarten), a presenta e resolucion aki na e delegacion di Staten-Generaal di Hulanda (Eerste y Tweede Kamer).