Diaranson awor, 24 de juni, lo tuma luga un welga nacional den e sector di transporte publico na Hulanda. E accion aki, organisa pa e sindicatonan FNV y CNV, lo afecta structuralmente e horarionan di salida di tren, bus, tram y metro, locual lo wordo sinti durante henter e dia.
E compania di transporte publico di Amsterdam, GVB, a confirma cu nan tambe ta participa na e welga. Esaki nifica cu nan servicio di metro, tram y bus lo no cuminsa core prome cu 08:00 di mainta. GVB a emiti un aviso serio pa e biaheronan, indicando cu e comienso tardi aki lo tin un efecto di cadena (“knock-on effect”) cu lo por interumpi e servicio durante henter e dia. Solamente e servicio di barco lo sigui opera normalmente.
Motibo di e welga: “E gabinete no ta scucha”
E motibo principal pa e interupcion aki ta e planonan di e gabinete Hulandes pa haci reduccion (bezuinigingen) den e sistema di siguridad social. Segun e sindicatonan FNV y CNV, e gobierno no ta cumpli cu e acuerdonan acorda caba relaciona cu e pension di biehes (AOW). Banda di esaki, e gobierno kier corta den e tempo di duracion di e areglo di desempleo (WW) y ta empeora e condicionnan di e ley di incapacidad pa traha (WIA). E consecuencia di esaki ta cu trahadonan lo mester traha pa mas aña y lo perde siguridad financiero den caso cu nan bira malo of perde nan trabou.
E sindicatonan a duna un ultimo aviso (ultimatum) te cu dia 25 di mei pa e planonan aki wordo cancela. Como cu e gobierno no a reacciona na e demanda aki, e prome huelga a wordo prepara pa dia 24 di juni.
E gabinete ta nenga di scucha e preocupacionnan di e clase trahado,” e dirigente di FNV Vervoer, Edwin Kuiper, a declara. “Nos no ta haciendo esaki solamente pa e trahadonan den transporte publico, sino pa tur e Hulandesnan cu ta depende di un bon siguridad social.”
Esaki ta djis un aviso: Accionnan mas grandi por sigui
E sindicato a adverti cu e welga di diaranson awor ta net e prome paso (“speldenprik”). Si despues di e periodo di vakantie di e di dos parti di aña (na fin di zomer) e gabinete no bini cu un solucion of promesa concreto, e sindicatonan lo organisa accionnan hopi mas grandi.
Kuiper a subraya cu den e caso ey, mester cuminsa pensa riba welga cu lo dura un 24 ora completo, locual lo paralisa e pais .
Si bo mester uza transporte publico diaranson 24 di juni den mainta tempran, busca alternativo di transporte of pospone bo biaha te despues di 08:00 di mainta, teniendo cuenta cu e retrasonan por dura henter dia.