Hopi hende kisas no sa kico ta e balor cu e matanan di mangroven nan ta pa nos mes como serhumano y e naturalesa. Segun Research and Conservacion Manager Giancarlo Nunes e matanan di mangrovenan tin diferente funcionnan cu ta importante pa nos cu ta serhumano, un di nan ta cu nan ta proteha nos costanan, antes e matanan di mangroven tabata na tur costanan y nan ta proteha e isla di tempo malo ora cu ta tempo di horcan y e lama ta bruto cu e por kibra e costa, pero e mangroven nan ta proteha e costa y ta preveni cu e horcan y e lama bruto ta kibra nos costa.
E trabao di e mangroven nan ta cu nan ta gara e impacto di e horcan y lama bruto nan ta dempel e pa proteha nos costa. Un di e otro aspectonan ta tambe cu e mangroven nan ta e matanan cu ta miho pa haci e aire limpi, nos no ta consciente cu den aire nos tin hopi polucion. E mata di mangrove ta filtra e aire hopi bon pa saca e CO2 di sistema. Un otro funcion di e mangroven nan tin ta cu nan ta e mata cu e piscanan ta scoge pa broei den nan unda cu e piscanan chikito ta biba memei di e raisnan di mangel pa nan keda protegi pa e piscanan grandi no por yega cerca nan pa asina nan haya e chance di bira adulto pa asina despues nan por bay den e rif.
Tambe e mata di mangroven ta filtra awa, no ta solamente e polucion di aire nan ta filtra pero tambe nan ta filtra e polucion cu tin den awa.
Actualmente Fundacion Parke Nacional Aruba (FPNA) ta haciendo e preparacion di tur e proceso y ta spera cu den juni por cuminsa ehecuta e trabaonan necesario y pa juli lo tin resultadonan cu por cuminsa avisa con tur cos ta cana. Sinembargo e proyecto mes ta pa full un aña unda cu ta cuminsa cu un sondeo pa mira con e sistema ta bay cambia despues cu a haci e cambionan di henter e proceso cu lo mester tuma luga.
Fundacion Parke Nacional Aruba (FPNA) ta hopi contento cu na Aruba actualmente tin un interes grandi awo pa proteccion di naturalesa y cu ta yuda nos naturalesa, pero tambe tin mas conscientisacion y mas interes pa proteha nos naturalesa pa Aruba por tin un naturalesa mas sano. Por bisa cu e animo ta halto y nan kier yuda pa asina Aruba tin un miho naturalesa. E proyecto aki ta wordo haci cu fondonan Europeo y ta haci posibel cu e investigacionnan y pasonan por wordo tuma.