Aruba Airport Authority N.V. (AAA) a celebra oficialmente e apertura di AUA Food Truck Plaza nobo, situa dilanti di e area di yegada na Aeropuerto Internacional Reina Beatrix.
E ceremonia di apertura a conta cu cortamento di cinta oficial door di e bendedonan di cuminda y Jonny Andersen, CEO di Aruba Airport Authority N.V., marcando e lansamento di e area di encuentro nobo aki na aeropuerto.
E apertura a conta cu presencia di e miembronan di e comunidad di aeropuerto, medionan local y influencers pa experencia e plasa y purba diferente di e opcionnan di cuminda y bebida disponibel awo na aeropuerto. Esnan presente a disfruta di snack local, batido y koffie mientras nan tabata pasa tempo na e luga di encuentro di mas nobo na aeropuerto.
A crea e AUA Food Truck Plaza pa tur hende cu ta pasa banda di e area di aeropuerto, for di famia y amigonan cu ta warda e pasaheronan cu ta yega of despedi di esnan cu ta bayendo, te na e pasaheronan cu ta yega of sali di aeropuerto, trahadonan di aeropuerto, taxista, bishitante y localnan cu ta busca algo pa come, un koffie of un bebida refrescante.
Actualmente e plasa ta conta cu cuater concepto di cuminda local:
El Tio EXPRESS – habri tur dia di 7:00 AM pa 7:00 PM
SANTOS x Keda Keto – habri tur dia di 7:00 AM pa 7:00 PM
Mauchi Smoothies Juice Bar – habri tur dia di 7:00 AM pa 6:30 PM
Dushi Flavors – habri di dialuna pa diasabra di 7:00 AM pa 7:00 PM y diadomingo di 7:00 AM pa 3:00 PM.
E plasa nobo ta crea un espacio agradabel cerca di aeropuerto caminda e personanan por relaha prome cu busca of baha pasahero, mientras cu alabes ta duna e empresarionan local un espacio di visibilidad halto pa conecta cu tanto e localnan como tambe cu e biaheronan.
“AUA Food Truck Plaza ta un espacio nobo y agradabel caminda e hendenan por sinta, relaha y disfruta di algo pa come of bebe mientras nan ta warda riba nan famia of amigo”, asina Barbara Brown, Chief Revenue Development & Communications Officer di Aruba Airport a duna di conoce. El a continua bisando cu: “Ademas e ta duna e negoshinan local di cuminda un oportunidad pa demostra kico nan ta ofrece na un espacio caminda tanto local como bishitante ta bin hunto tur dia.”
AUA Food Truck Plaza awo ta habri oficialmente y ta yama bonbini na comunidad, bishitantenan y pasaheronan di aeropuerto pa pasa y disfruta di un sabor di Aruba.
Tocante Aeropuerto di Aruba
AUA Airport ta un di e aeropuertonan mas ocupa den region Caribe, cu mas di 24 diferente aerolinea operando na Aruba contribuyendo na mas cu 3.2 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 74% ta di Merca y Canada, 18% ta di Latino America, 4% ta di Europa y 5% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta sosode na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
