Centro di Bario Noord ta invita pueblo di Aruba pa wak partido riba pantaya gigantesco!
Den cuadro di e dos wega importante di nos isla ruman Corsou, Centro di Bario Noord, un centro comunitario di Aruba, hunto cu e comunidad di Noord y Aruba den su totalidad, ta desea di mustra un sosten masal na e ekipo di nos isla ruman.
“Nos ta di opinion cu na e gran logro aki, unda un isla chikito a logra clasifica pa e Campionato Mundial. Nos ta hopi entusiasma pa e dos wega aki y kier mustra nos sosten pleno pa Corsou.”
Asina tambe, Centro di Bario Noord y su comunidad ta invita tur hende di Aruba pa bin reuni hunto y biba e emocion di futbol – Corsou vs Ecuador. Un anochi special yen di futbol, orguyo y union den reino, durante e gran partido entre Corsou y Ecuador, cu lo wordo transmiti riba un pantaya gigantesco na Centro di Bario Noord.
Porta lo habri pa 6:00PM, dunando oportunidad pa tur bishitante y fanatico yega tempran, haya bon luga y cuminsa disfruta den un ambiente di “Blue Wave.” Pa solamente Afl. 25,00, bishitante lo por disfruta di un bucket di Tapa Cora of Chill refrescante, creando e combinacion perfecto pa un anochi di deporte y sosten di hermandad pa nos isla ruman Corsou.
Futbol tin un historia profundo na Corsou. Durante decada, e isla a produci talento extraordinario cu a laga nan marca no solamente den Caribe Hulandes, pero tambe den liganan di nos Madre Patria, Hulanda. Di clubnan local te seleccionnan cu a compiti na nivel halto, Corsou a mustra cu pasion pa futbol ta core profundo den su cultura. Awe, nos ta mira e resultado di e dedicacion cu un ekipo fuerte y determina cu ta representa e isla cu orguyo.
Aruba y Corsou, como isla ruman, semper a comparti un laso special basa riba historia, cultura y hermandad. Durante momentonan manera esaki, e conexion aki bira mas fuerte ainda. E partido di diasabra no ta solamente un wega; ta un celebracion di union, orguyo di reino y di apoyo como islanan ruman.
Tur hende ta invita pa bin forma parti di e experiencia aki y mustra nan apoyo pa Corsou – “Blue Wave.” Bisti bo color blauw, hiba bo banderanan y laga nos crea un atmosfera di entusiasmo y energia cu lo haci nos ruman di Corsou sinti e respaldo for di Centro di Bario Noord, Aruba.
No perde e oportunidad pa biba e emocion hunto cu famia, amigonan y comunidad. Nos ta spera bo na Centro di Bario Noord pa un anochi inolvidabel di futbol, union y alegria.
Corsou, nos ta cu bo! Sigui move! #siguimovekorsou
