Den e oracion di nos Tata, nos ta ripara con grandi E ta pa nos, cu Dios ta un Tata pa nos tur, y cu nos por pone tur cos den su man.
E no ta un tata temporal, pero E ta nos Tata eterno, pasobra pa semper e tey, y hunto cun’E , Su misericordia y Su bondad semper lo tey pa nos.
E ta stima nos tur igual, e no kier pa ningun di nos bay perdi, Su amor pa nos ta asina grandi, cu e a entrega su Yiu unigenito pa ken cu kere den dj’E no bay perdi ma tin bida eterna.
Y den esaki nos tur tin cu reconoce e amor grandi cu Dios, tin pa nos, e amor inmenso, e amor berdadero, cu Dios tin tur dia pa nos, amor cu no ta cansa, amor cu ta crece, amor yena cu goso y paz, un amor berdadero di un Tata pa Su yuinan.
Cristo Hesus a sinja nos e oracion di nos Tata, pa recorda nos tur cu nos tin un Tata, y cu mescos cu E ta Tata pa Hesus Cristo, E ta Tata pa nos tambe, y nos tur tin mes derechi pa aserca Dios como Tata, nos tur por yega serca dj’E pa medio di Cristo Hesus, pasobra Hesus mes a bisa Ami ta e caminda, e berdad y e bida, ningun hende por yega serca e Tata sino ta pa medio di Mi.
Esey ta palabra fuerte y poderoso, palabra fiel y berdadero, den cual tur hende mester reconoce cu esun cu tin e Yiu tin e Tata.
Mas ainda ora ta para scirbi den Juan 3:36 cu ta bisa lo siguiente: Esun cu kere den e Yiu ti bida eterno,ma esun cu no obedece e Yiu,lo no mira bida, ma e furia di Dios ta keda riba dje.
Como Tata nos tin e deber y mandato di Dios, pa stima y cuida nos yuinan, dedica tempo na nos yuinan, guia nos yui den e caminda di Dios, sea un mentor di berdad pa nos yiu, duna testimonio cu nos propio bida na nos yiu, pa esaki con biba.
Pasobra ken cu kere den Cristo Hesus lo ta salba, y lo no keda brongosa, esey ta locual nos mester sembra den nos yuinan den e tempo trabahoso aki, cu den Cristo Hesus no tin perdida.
Ma Dios e demostra su amor den esaki, cu tempo nos tabata pecador ainda, Cristo a muri pa nos. ( Romanonan 5:8).
Mira ki un amor grandi e Tata a duna nos, cu nos por wordo yama yuinan di Dios, y esey nos ta, pesey mundo no conoce nos,pasobra E no conoce E.( 1 Juan 3:1).
Nos ta stima pasobra E a stima nos prome. ( 1 Juan 4:19).
Senjor no ta tarda cu su promesa, manera algun tin esaki pa tardansa,ma E tin pasenshi cu boso,y no kier pa ningun hende bay perdi , ma pa tur bin na arepentimento.
( 2 Pedro 3:19).
Si nos keda pega den e sistema mundial di religion, nunca un hende por compronde e amor berdadero di Senjor , pasobra na prome lugar Dios no tin distincion di persona. E a bisa cu tur cu renoce Cristo Hesus como Senjor y Salbador lo tin bida eterna.
Pesey tambe ta para scirbi kico lo pasa cu esnan cu no kier reconoce Dios den Romanonan 1:28-32.
Y tambe den 2 Thesalonisensenan 2:11-12.
Dios su amor pa nos ta grandi, y di berdad e ta infinito y inigualabel.