Red Democratico (ReD) ta cuestiona e reciente discurso rond di economia circular y e manera cu e tema ta wordo presenta como si fuera un iniciativa nobo bou di e gobierno actual. Segun ReD, e realidad ta cu e maneho oficial di Economia Circular ya tabata un hecho desde varios aña atras y a keda formalmente entrega den e overdrachtsdocument di ex-minister di Desaroyo Sostenibel, Lampe, na e minister actual di Economia, Geoffrey Wever.
ReD ta destaca cu e maneho di Economia Circular tabata forma parti di un vision mas amplio pa transforma e modelo economico di Aruba, cu enfasis riba reduccion di desperdicio, reutilisacion di materia prima, reciclaje y un uso mas sostenibel di recurso. E maneho tabata conecta tambe cu e decision di e gobierno di e tempo ey pa elimina e uso di saco di plastic di supermercado, como un medida pa reduci desperdicio y proteha e medio ambiente.
Segun ReD, e punto importante ta cu e base di e maneho ya tabata poni y documenta. E partido ta cuestiona, p’esey, si e gobierno actual ta realmente introduciendo algo nobo, of si simplemente ta presenta como un iniciativa propio algo cu ya tabata keda desaroya, formalisa y entrega door di un gobierno anterior.
𝗡𝗼 𝘁𝗮 𝗻𝗲𝗰𝗲𝘀𝗮𝗿𝗶𝗼 𝗶𝗻𝘃𝗲𝗻𝘁𝗮 𝗲 𝘄𝗶𝗲𝗹 𝗱𝗶 𝗻𝗼𝗯𝗼I
ReD ta bisa cu un maneho di tal importancia no ta algo cu mester wordo reinventá cada biaha cu tin un cambio di gobierno. Mas bien, e partido ta sostene cu e gobierno actual mester evalua e trabou cu ya a keda haci, sigui cu e bon iniciativa y, unda ta necesario, mehora y amplia e maneho existente.
“Economia circular no a nace awe. E maneho oficial ya tabata existi y a keda inclui den e overdrachtsdocument di e ex-minister Lampe. E decision pa reduci y eventualmente elimina e uso di saco di plastic y e vision pa un economia mas sostenibel tabata parti di e mesun direccion. P’esey, no ta correcto pa presenta e tema como si economia circular ta un concepto nobo cu ta wordo introduci solamente awor,” segun ReD.
E partido ta recorda cu despues di e periodo di gobierno durante cual e maneho a keda desaroya y entrega, e gobierno cu a sigui no a continua cu e plan na e mesun manera. Segun ReD, e gobierno actual tampoco a duna continuidad suficiente na e vision original.
𝗖𝗼𝗻𝘁𝗶𝗻𝘂𝗶𝗱𝗮𝗱 𝗱𝗶 𝗽𝗼𝗹𝗶𝘁𝗶𝗰𝗮 𝘁𝗮 𝗲𝘀𝗲𝗻𝗰𝗶𝗮𝗹 𝗽𝗮 𝘂𝗻 𝗔𝗿𝘂𝗯𝗮 𝘀𝗼𝘀𝘁𝗲𝗻𝗶𝗯𝗲𝗹
ReD ta enfatisa cu economia circular no ta solamente un concepto moderno of un termino politico. E ta un modelo di desaroyo cu ta exigi planificacion a largo plazo, inversion, educacion, legislacion y cooperacion entre gobierno, sector priva, comercio y comunidad.
Un transicion real pa un economia circular ta implica, entre otro, reduci e cantidad di desperdicio cu Aruba ta produci, promove reutilisacion y reciclaje, reduci dependencia di producto cu ta wordo importa pa un solo uso y busca manera pa materia prima keda den e ciclo economico pa mas largo tempo.
Segun ReD, e tipo di politica aki ta demasiado importante pa wordo trata como un iniciativa di un solo gobierno of partido politico. E mester wordo trata como un compromiso nacional y un politica di largo plazo.
E partido ta pidi, p’esey, pa e gobierno actual sea transparente tocante e maneho cu ya tabata existi, e contenido di e overdrachtsdocument y e medida cu a keda toma den e pasado. ReD ta considera importante pa pueblo di Aruba por distingui claramente entre loke ta realmente nobo y loke ya tabata keda desaroya durante un periodo anterior.
𝗥𝗲𝗗 𝘁𝗮 𝗽𝗶𝗱𝗶 𝗰𝗹𝗮𝗿𝗶𝗱𝗮𝗱 𝘆 𝗮𝗰𝗰𝗶𝗼𝗻
ReD ta bisa cu e partido ta den favor di sigui promove un economia mas sostenibel y di busca solucion pa e problema di desperdicio y contaminacion na Aruba. Sin embargo, e partido ta considera cu e debate publico mester basa riba hecho y continuidad institucional.
“Si e gobierno actual ta realmente serio cu economia circular, e prome paso mester ta pa reconoce y construi riba e maneho cu ya tabata existi. No ta necesario inventa e wiel di nobo. E wiel ya tabata inventa, e maneho ya tabata proclama y e overdrachtsdocument ya tabata entrega. Loke Aruba mester awor ta continuidad, implementacion y resultado,” ReD ta declara.
ReD ta conclui cu e transicion pa un economia circular mester wordo acelera, pero cu e proceso mester wordo conduci cu transparencia y respeto pa e trabou cu ya a keda haci. Pa ReD, e prioridad no ta ken ta reclama credito pa e maneho, sino cu Aruba finalmente por mira resultado concreto di un politica di sostenibilidad cu ta beneficia e generacion actual y e generacionnan cu ta bin despues.
Red Democratico (ReD)