Loke ta tumando luga awor aki den politica local ta exigi un atencion inmediato. Un generacion nobo di politico, cu no a pasa den e sufrimento y e lucha real di e añanan di Status Aparte, ta parce di kier entrega e autonomia di e pais na Hulanda y colonisa esaki un biaha mas manera tabata prome cu 1986. E diferencia di 1986 awo ta cu Aruba tin economia y entradanan fuerte, pero si Hulanda ta bay dicidi den finansas con esaki lo wordo maneha?
Nos lo bay bek den sclavitud moderno unda cu e pais lo traha manera catibo y e placa realmente lo keda na Aruba of Hulanda lo haya e poder di cobra y duna Aruba loke nan kier? Esaki lo ta un bon futuro pa Aruba? Nos no mester lubida cu Aruba ya caba a biba e storia aki unda cu nos oro a bay pa Hulanda y Aruba mes no a disfruta di su cosecha. Ta esaki ta e direccion cu e gobernacion di AVP y FUTURO ta hincando Aruba?
Tratadonan politico ta mustra riba e decisionnan cu e gobernacion di AVP y FUTURO ta tumando, kendenan ta parce di ta colabora cu e presionnan di Hulanda, incluyendo e maneho rond di proyectonan di ley manera Rijkswet HOFA. E pregunta cu henter pueblo mester haci ta: kico ta e berdadero meta tras di e colaboracion aki?
Declaracionnan reciente y e siguimento di e plannan di secretarionan di estado ta mustra un traicion politico alarmante. Figuranan manera e minister di FUTURO Geoffrey Wever, Gerlien Croes, Mike Eman (AVP), e minister plenipotenciario Milly Schwengle, hunto cu e Staatsecretaris di Hulandes Eric van der Burg, ta wordo apunta como actor-nan clave cu ta pushando medidanan cu por mina e soberania interno di Aruba. E puntonan di bista cu ta scucha ta parce di kier “colonisa Aruba bek” bou di e pretexto di sosten financiero.
Pa pone esaki den perspectiva, Aruba su status di pais autonomo den Reino Hulandes no ta un caso isola, pero ta forma parti di un grupo selecto di teritorio rond mundo cu a sali di un pasado colonial sin opta pa independencia total, manteniendo un laso constitucional fuerte:
• Den Reino Hulandes: Aruba (1986),
• Corsou (2010), y Sint Maarten (2010) un status aparte diferente cu esun di Aruba
• Den Asociashon Liber: Cook Islands y Niue cu Nueva Zelanda.
• Den Reino di Dinamarka: Groenlandia y Islas Feroe.
Asina tambe, paisnan riba teritorio global manera esnan den Caribe, Africa y Asia a lucha pa nan propio libertad economico y politico. E ironia doloroso ta cu, mientras cu otro paisnan a bringa pa proteha nan autonomia contra influencia externo, awe ta e mesun gobernantenan local di AVP y FUTURO ta habri porta pa kita e mesun libertad cu Betico Croes a laga atras pa e pueblo di Aruba.
E pueblo di Aruba mester keda alerta. E autonomia interno no ta un regalo; e ta un derecho conkista cu mester keda defendi cu uñas y dientes. Awe, e lucha di Betico Croes ta enfrenta su prueba mas grandi contra ambicionnan politico cu ta pone interes di partido riba e futuro di e patria. Aruba su bandera, su florin, y su futuro ta keda den man di un pueblo cu no por permiti pa descarta e sacrificionan di pasado pa un promesa falso di alivio financiero.
E inmigrantenan cu a scoge Aruba pa bin biba tambe mester ta bon na altura. Saliendo di nan paisnan mas cu tur hende, nan mester sa e diferencia di biba den un pais liber autonomo of un pais colonisa. Awo, nos kier esaki pa Aruba? Mes un cos cu ta recorda nan libertad y autonomia di nan Pais y ta honra nan bandera , esaki ta e sosten cu Aruba tambe tin mester pa mantene su autonomia y wanta e bandera y Humno di Aruba e Pais cu nan a haci nan di dos cas.