Parlamentario Edgard Vrolijk a tuma nota cu Gobierno a organisa un dia nacional di recogemento di sushi rond di Aruba. Esaki ta un bunita paso pa crea conscientisacion den comunidad, locual e parlamentario ta aplaudi. Sinembargo, Vrolijk ta enfatisa cu e reto di mas grandi ta e falta di un maneho structural pa atende cu procesamento di desperdicio cu un vision pa futuro. E aspecto cu mas ta resalta den e problematica aki ta e falta total di control y cumplimento di ley pa por caba definitivamente cu e tiramento di sushi ilegal den mondi y den dumpnan clandestino riba terenonan priva
No tin un plan sostenibel y duradero pa maneho di sushi
Gabinete AVP-FUTURO ta rumbo pa cumpli dos aña di gobernacion, sinembargo te dia di awe no a presenta un plan concreto pa restructura Serlimar. Parlamentario Vrolijk ta enfatisa cu mester explora con e compania estatal aki por yega na un solucion a largo plaso pa procesa desperdicio. E solucion temporal cu tin actualmente na Sero Teishi ya caba ta causando molester na e habitantenan di e area debi na e holor fuerte. mientras e ta sigui destrui nos naturalesa y medio ambiente diariamente. Es mas, e situacion aki ta destruyendo nos naturalesa y medio ambiente diariamente.
Vrolijk ta señala cu na Hulanda mes, nan a pasa hopi tempo caba pa e sistema di kima sushi, locual ta haci cu mester menos espacio pa landfill. Cu un vision real y structural asina, lo por haci Serlimar rendabel bek y garantisa un solucion definitivo pa e problema di sushi na Aruba.
Falta di ehecucion estricto di ley y control
Den e Politieverordening tin sancionnan stipula cu por yega te na 10.000 florin pa esnan cu ta crea dump ilegal. Sinembargo, e Minister di Husticia, sr. Arthur Dowers, ken alabes ta encarga cu e maneho di desperdicio, no ta aplicando e leynan aki debidamente. Si duna multanan halto na esnan cu wordo gara den e actividadnan aki, lo por pone un paro definitivo na e situacion. Pero mientras cu autoridadnan no actua, e fechorianan aki ta lo sigui tuma luga.
E mito di tereno priva
Tur hende na Aruba, incluyendo doñonan di tereno priva, tin cu tene nan mes na regla y mester tin nan permisonan na ordo. P’esey nos tin e ROPV cu ta reglamenta structuralmente ki sorto di actividad por tuma luga den e diferente zonanan di Aruba. Esaki ta duna e Minister di Infrastructura e autoridad pa actua, pa para tur cos cu ta contra ley, y impone sancionnan cu ta core den boetnan basta halto.
Si nos Gobierno no ta percura pa un handhaving berdadero, nos por tene hopi accion di limpiesa, pero e dumpnan ilegal lo sigui aparece tur caminda. Esey ta sigui causa daño na naturalesa y medio ambiente door di dera tur sorto di desperdicio sin control, plamando sushi den henter e vecindario. Maske cu tin bon intencion, sin handhaving nos ta leu di cas. Pesey, Vrolijk a finalisa bisanco cu e ta urgi pa Gobierno intensifica e cumplimento di ley, pa asina structuralmente nos por ta riba e bon caminda.