Minister di Husticia y Integracion, mr. drs. Arthur Dowers, hunto cu Minister di Turismo mr. Wendrick Cicilia, a atende un ceremonia special unda comunidad Peruano residente na Aruba a celebra e 205 aña di Independencia di Republica di Peru. E acto, celebra riba Plaza Simon Bolivar, a trece representantenan di Gobierno di Aruba, miembronan di Parlamento y representante di e comunidad Peruano hunto pa honra e lasonan historico y di amistad entre ambos nacion.
Minister Dowers a felicita e comunidad Peruano y a subraya nan aporte importante na sociedad Arubano. Den su palabra, e Minister a elogia e comunidad Peruano como un grupo trahado, dedica y comprometi cu ta contribui activamente na desaroyo di Aruba, specialmente den sectornan manera construccion, gastronomia y deporte. Segun Minister Dowers, e contribucion diario di e comunidad Peruano ta fortalece economia y bienestar di nos pais.
Representando e comunidad Peruano, ciudadano Carlos Fernandez Joo a expresa su profundo orguyo di por celebra un biaha mas e fecha historico di 28 di juli na Aruba. El a enfatisa cu, apesar di ta asina leu for di nan Pais natal, e amor pa Peru y e orguyo di nan identidad ta keda firme den nan curason. Segun Fernandez Joo, celebracionnan manera esaki no solamente ta mantene cultura y tradicion bibo, sino tambe fortalece e lasonan di amistad, respet mutuo y gradicimento entre Peru y Aruba.
E ceremonia a conclui den un ambiente festivo di union y fraternidad, resaltando e estrecho relacion cu tin entre Aruba y e comunidad Peruano, cu a traves di nan trabou, cultura y compromiso ta sigui aportando positivamente na desaroyo di nos comunidad.
