A topa cu scooternan procedente di ladronicia Diabierna 4 di september, rond di 6:45 di mainta, un patruya durante un control rutinario a topa cu dos scooter probablemente procedente di ladronicia riba Kaya General C.M. Piar. Despues di investigacion mas aleu por a confirma cu un di e scooternan ta registra como horta. Tin sospecho cu e di dos scooter tambe ta procedente di ladronicia. A confiska ámbos scooter pa mas investigacion.
Detenshon pa insulta un funcionario den funshon i pa maneha bou di influencia Diabierna 4 di september, rond di 12:50 di marduga, a detene un homber di inicial C.V.B. di 50 aña di edad riba Kaya Korona pa resisti detenshon, pa no cumpli cu ordu di polis, pa insulta un funcionario den funcion i pa maneha bou di influencia di alcohol. Un patruya a mira e sospechoso pasa cu velocidad haltu i a bay su tras pa dun’e señal pa para. Ademas e tabata core saca/zelu riba caminda. Durante control, e sospechoso no por a mustra un rijbeweis ni documentonan di seguro. E tabata mustra diferente carakteristika di un persona cu ta bou di influencia di alcohol i a nenga di haci un test di supla. Na momento di su detenshon el a resisti, di cual mester a haci uzo di fuerza pa detene e sospechoso. Ademas el a insulta un agente policial. Na warda di polis, e sospechoso no tabata kier coopera pa haci un analisis di rosea. Debí na comportamiento di e sospechoso na warda di polis, a hibe JICN. El a haya multa pa maneha sin rijbeweis, i pa no por mustra documentonan di seguro. Ademas e agente policial a entrega keho di insulto.
Ladronicia di bicicleta elekto Djaweps 3 di september a drenta keho di ladronicia di un bicicleta electrico (fatbike), color preto, modelo V20. E bicicleta tabata staciona patras di un establecimiento di horeka riba Boulevard Gobernador N. Debrot na momento cu desconosinan a bay cune. Ta investigando e caso.
Ladronicia di scooter Djaweps 3 di september a drenta keho di ladronicia di un scooter color blanco di marca Sym, modelo X-Pro, cu plachi di number MF-2736. E scooter tabata staciona dilanti di un cas riba Kaya Suecia. Ta investigando e caso.
Mas chauffeur deteni pa maneha bou di influencia di alcohol Djaweps 3 di september, rond di 2:50 di atardi, meldkamer central a ricibi notifikacion tocante un accidente entre dos vehiculo riba un sitio di stacionamentu di auto di un supermercado riba Kaya Industria. Conforme e maneho di ‘botsen is blazen’, a haci un test di supla cu ámbos chauffeur. Serka un chauffeur, e test a duna indicacion tocante uzo di alcohol riba e limite permiti pa ley. A detene e homber di inicial D.R.C. di 54 aña di edad pa maneha bou di influencia di alcohol i despues a transporte pa warda di polis pa un analisis di rosea. El a haya prohibicion di maneha pa 1 ora.
Diaranson 2 di september, rond di 7:50 di anochi, meldkamer central a ricibi notificacion tocante un accidente entre tres auto riba Kaya Korona. Conforme e maneho di ‘botsen is blazen’, a haci un test di supla cu tur chauffeur envolvi. Serka un chauffeur, e test di supla a duna indicacion tocante uzo di alcohol riba e limite permiti pa ley. A detene e homber di inicial F.B.W. di 61 aña pa maneha bou di influencia di alcohol i a hibe warda di polis pa haci un analisis di rosea. El a haya prohibicion di maneha pa 6 ora. A traha proces-verbal pa ámbos chauffeur.
Ladronicia for di tereno Djaweps 3 di september a drenta keho tocante ladronicia for di un tereno riba Kaya Sabaló. Entre diamars 18 di augustus i djaweps 3 di september, desconosinan a bay cu un martiu hidraulico (hydraulische hamerbeitel) for di e tereno. Ta investigando e caso aki.
Ladronicia for di vehiculo na sitio di buseo Djaweps 3 di september a drenta keho di ladronicia for di un vehiculo staciona na e sitio di buseo Karpata. Diaranson 2 di september, entre 3:10 di atardi i 4 or di atardi, esnan envolvi tabata sambuya. Ora nan a regresa, a resulta cu a horta dos sacu cu contenido for di e vehiculo. Ta investigando e caso aki.