Tourism Corporation Bonaire (TCB) a duna rekonosementu na shete bishitante komo embahador di Boneiru na luna di desèmber 2023.
E bishitantenan akí a keda honrá den kategoria di plata, oro i platina. Rick Kramer prosedente di Hulanda a haña rekonosementu pa ta bishitando Boneiru pa 18 aña. Na e okashon akí a entreg’é un feneta di plata.
Feneta di oro a keda otorgá na Lydia i Adam Pearce pa 20 aña di bishita na nos isla i na Samuel Holcman ku ta bishitando Boneiru pa 22 aña. Tur tres ta prosedente di Merka. Miéntras Cees Kramer di Hulanda tambe a risibí feneta di oro pa 25 aña di bishita na Boneiru.
Pa Jay i Patricia Pearce, mayornan di Adam i Lydia, 4 di desèmber tabata un dia inolvidabel pa motibu ku no solamente nan a keda rekonosé pa 30 aña di bishita na Boneiru i na e okashon akí a risibí un plakat di platina, pero tambe pa motibu ku tabata fecha di nasementu di Patricia. Tabata un berdadero sorpresa ora nan a risibí nan rekonosementu i tur hende a kanta Happy Birthday pa Patricia kende a haña un bukèt di flor pa su kumpleaño.
E seremonianan tabata na enkargo di Helen Mercera ku a gradisí tur e embahadornan pa e echo ku pa hopi aña largu nan a skohe pa bishitá Boneiru. Tambe Helen Mercera a ekspresá e deseo ku e wéspetnan akí lo sigui promove Boneiru den eksterior.
