Entidat Públiko Boneiru ta anunsiá ku Elfried Francisco Jozephia, Lilian Paula-Crestian i Cliff Bruno Frans ta bira e tres Siudadanonan di Honor nobo di Boneiru. Djadumingu 6 di sèptèmber 2026 durante e seremonia protokolar di Dia di Boneiru ta nombra nan ofisialmente komo Siudadano di Honor. Nan ta risibí e rekonosementu spesial akí pa nan dedikashon i aporte balioso di hopi aña largu na Boneiru i na komunidat boneriano.
E tres futuro Siudadanonan di Honor kada un na nan propio manera i riba diferente tereno a komprometé nan mes pa nos komunidat. Despues di nan nominashon, Kolegio Ehekutivo a disidí pa riba Dia di Boneiru nombra nan komo Siudadano di Honor di Boneiru.
Elfried Francisco Jozephia Elfried Francisco Jozephia pa mas ku diessinku aña a dediká su mes na mucha i hóben na Boneiru. Pa medio di e deporte di karate e no a solamente duna hóbennan guia deportivo, pero tambe struktura i disiplina, i el a yuda nan ku nan desaroyo personal. Su dedikashon a bai mas leu ku dunamentu di lès di karate. E tabata buska e muchanan na kas i despues di treinen e tabata trese nan kas bèk. E tabata organisá kompetensia i e tabata sòru pa paña di karate pa muchanan di famia ku ménos posibilidat finansiero. Pa su dedikashon e no tabata pidi ningun kompensashon. Ku su enbolbimentu di hopi aña largu Jozephia a duna un aporte balioso na hóbennan, na deporte i na komunidat boneriano.
Lilian Paula-Crestian Durante mas ku 36 aña Lilian Paula-Crestian a dediká su mes na komunidat boneriano. Su dedikashon a enfoká prinsipalmente riba enseñansa, desaroyo di hóben, nos idioma papiamentu i trabou sosial. El a traha entre otro komo dosente di papiamentu, koordinadó di èksámen i mèntòr di hóbennan. Banda di su trabou profeshonal, durante hopi aña Lilian Paula-Crestian boluntariamente a dediká su konosementu, eksperensia i tempu na nos komunidat. Ku esaki el a kontribuí na desaroyo edukativo i personal di diferente generashon di hóbennan boneriano. Ku su enbolbimentu di hopi tempu largu ku enseñansa, hóbennan i nos komunidat, el a duna un aporte balioso i permanente na Boneiru.
Cliff Bruno Frans Cliff Bruno Frans a dediká su mes pa mas ku diesseis aña largu na komunidat boneriano. Pa medio di entre otro Big Papa el a saka potrèt i kubri notisia, eventonan kultural i desaroyonan na Boneiru i el a kompartí esakinan ku nos komunidat. Di e manera akí el a yuda bonerianonan tambe ku ta biba pafó di Boneiru pa keda konektá ku nos isla. Banda di esaki Cliff Frans a dediká su mes na dokumentashon di patrimonio boneriano, entre otro huntu ku Bòi Antoin. Pa medio di dokumentá storia, imágen i otro komponentenan di nos patrimonio kultural, el a yuda konservá konosementu balioso pa e generashonnan aktual i esunnan di futuro. Ku esaki Cliff Frans a duna un aporte balioso na visibilidat i konservashon di kultura, historia i identidat di Boneiru.
Durante e seremonia protokolar di Dia di Boneiru dia 6 di sèptèmber ta nombra Elfried Jozephia, Lilian Paula-Crestian i Cliff Frans ofisialmente komo Siudadano di Honor di Boneiru. Ku e rekonosementu spesial akí Boneiru ta ekspresá su apresio i gratitut pa nan dedikashon i enbolbimentu di hopi aña largu. Boneiru ta gradisí nan pa tur loke kada un di nan na nan propio manera a nifiká pa nos isla i nos komunidat.
