Hues a manda e companianan bay reuni sino e lo dicta sentencia
Hues a trata e caso sumario cu e compania Arspa a cuminsa contra refineria (RDA). Na dado momento Hues a manda e partidonan pa reuni y si no por yega na un palabracion, e lo dicta sentencia.
Por a compronde cu Arspa a demanda 14 Miyon na refineria RDA, pa trabaonan haci na refineria y no a haya pago. Hues a purba intermedia pa mira si por yega na un solucion. Na dado momento Hues a pospone e caso y manda e partidonan bay sinta na mesa. Dia 30 September 2026 lo mester notifica Hues si a yega na un palabracion concreto. Si no tin palabracion, Hues lo fiha un fecha pa sentencia.
Den sala di Corte tabata presente señor Arends e director, señor Helder e manager di e compania Arspa. Di banda di RDA tabata señor Hoeverts cu ta e presidente di e conseho di Comisario. Tambe tabata presente ingeniero Baletine di HCCS, kende ta esun cu tabata evalua e trabaonan cu Arspa tabata haci den refineria.
Abogado mr. Braam a representa Arspa y abogadonan mr. Gomez y mr. Cofee a representa RDA.
ARSPA KIER HAYA PAGO PA TRABAONAN HACI
Abogado mr. Braam a bisa Hues cu Arspa a haci trabaonan na 2 tanki y e pier di refineria pero RDA no a paga tur e trabaonan. E trabaonan ta den miyones. E abogado a mustra cu tabatin discusionnan y na April 2026, RDA a prohibi Arspa subi riba tereno di refineria, siendo cu RDA no a cumpli cu pagonan. Tabatin combersacionnan caminda na dado momento RDA kier pa Arspa traha riba e 2 tankinan cu ta calcula 8.4 Miyon florin y no traha mas riba e pier. E abogado a bisa Hues cu e tankinan a keda cla pero RDA no a paga. Na opinion di e abogado, tin trabaonan anterior tambe cu no a keda paga y ta calcula 14 Miyon florin.
RDA TA CUESTIONA ARSPA
Abogado mr. Gomez a cuestiona e demanda di 14 Miyon florin. El a bisa Hues cu no tin un splicacion satisfactorio di kico mester paga. E abogado a bisa Hues cu e no ta haya cu tin motibo di urgencia pa hustifica un caso sumario. El a bisa cu tur e sumanan cu Arspa ta menciona, no ta cuadra. El a mustra cu no a hustifica cuanto parti di e trabaonan realmente ta cla y cuanto mas falta. E abogado a bisa cu tin 6 proyecto cu ta forma parti di e trabaonan y tin trabaonan cu no a cuminsa ainda. Mr. Gomez ta remarca cu expertonan di RDA tin raportnan cu ta cuestiona cu e calidad di varios di e trabaonan no ta cumpli cu e exigencianan y Arspa no a cumpli cu esakinan. El a bisa cu tin engeniero specialisa cu ta controla e trabaonan. Ta door di esaki RDA a para e trabaonan. E abogado a bisa Hues cu Arspa no a cumpli cu palabracion cu ta encera cu na Maart 2026 mester a keda cla. Arspa a pidi pa alarga e periodo te October 2026. El a remarca cu no por ta asina cu por tin tardanza sin cu entre e partidonan ta di acuerdo cu esaki. E abogado a bisa cu e ta haya cu e demanda di Arspa no por wordo trata den un caso sumario sino den un caso mas profundo caminda expertonan lo mester determina kico realmente ta e gastonan. El a mustra cu RDA a paga regularmente y no por bisa cu no a cumpli. Ta Arspa no a cumpli cu entrega di trabaonan manera tabatin palabra. E abogado a bisa Hues cu RDA kier a bin cu un solucion practico pero Arspa no ta coopera. RDA tin derecho di para pago pasobra Arspa no a cumpli.
HUES A INTERMEDIA PA PURBA HAYA UN SOLUCION
Hues a haci preguntanan na e partidonan, kico nan kier, con nan lo kier sigui traha cu otro. Mr. Gomez a bisa cu e plan tabata pa para e caso sumario y pa reuni pa mira con lo por yega na palabracionnan nobo. Esey no a resulta y Arspa no kier sigui reuni. E trabaonan mester sosode. Especialmente e pier caminda barconan cu ta trece combustible mester mara. Mientras cu Hues tabata papia, Hoevertz a papia un rato cu mr. Gomez y despues mr. Gomeza a bisa Hues cu RDA no tin hopi confianza den Arspa mientras cu mr. Braam a bisa cu Arspa ta dispuesto pa sigui traha. Hues a cuminsa papia cu Baletine pero di parti RDA no kier pa scucha Baletine, pasobra Baletine a wordo invita door di Arspa pa ta presente den Corte. Mr. Gomez a bisa hues cu RDA kier a busca un experto indipendiente pero Arspa no a haci nada.
Hues a puntra Arspa si e ta accepta pa un otro experto evalua pa asina sali for di e problema aki. Mr. Braam a bisa cu si RDA ta dispuesto di paga loke debe, lo por papia pa haya un experto nobo. Hues a sigui intermedia y na dado momento por a scucha e experto Baletine bisa cu si RDA no tin confianza den dje, e ta hala un banda. El a splica Hues cu e tabata traha hopi bon cu e experto di RDA caminda tabata palabra tur cos adelanta. Awor e experto di RDA no tey mas. Aparentemente el a worde retira.
Hues a sigui intermedia pa mira si ta yega na un solucion. Abogado mr. Braam a bisa cu e trahadornan di Arspa ta di Trinidad pero door cu RDA a para trabaonan, nan a wordo manda bek. El a bisa cu si RDA kier pa sigui traha, lo mester busca nan y esey lo ta un tardanza di mas o menos 1 luna.
HUES A POSPONE CASO
Na dado momento Hues a remarca cu mirando e actitud di partidonan, e ta haya cu ta mihor e partidonan sinta na mesa y palabra concreto riba un experto individual. E experto lo mester evalua e trabaonan haci door di Arspa y tambe planea e trabaonan cu ainda falta di haci.
Ariba peticion di RDA, Hues a stipula cu pa dia 30 di September 2026 e lo mester haya contesta si partidonan a yega na un palabracion. Sino no tin palabracion, e lo bisa un fecha caminda e lo dicta sentencia.