E acumulacion di gasto medico no-paga pa personanan sin seguro incluyendo turistanan y personanan den situacion ilegal na Aruba a bira un preocupacion creciente y urgente pa e sistema di salud na Aruba. Den un intercambio reciente, ex-miembornan di Raad van Toezicht (Board of Supervisors) di hospital a hiba un discusion tocante e desaroyo aki cu a bin ta escala desde 2014 te cu e dia di awe.
E situacion ta debi na e aumento substancial di e gasto total cu hospital a haci pa cuida pashentnan cu no ta sigura na Aruba. E cifranan y e esfuersonan di e ultimo añanan ta ilustra e gravedad di e problema:
Evolucion di e debe: E suma di gasto no-paga a crece continuamente di 2014 te cu 2026, yegando na e cifra alarmante di 27.2 miyon florin, Asina parlamentario Gino Goeloe a extresa
Intento di cobranza sin exito: Den pasado, hospital a purba di uza un abogado Americano pa persigui e gastonan di turistanan cu a ricibi atencion y a bay sin paga. Sinembargo, e proceso legal mes a genera mas gasto cu e eficiencia of e suma cu a wordo ricibi bek.
Falta di accion: Mas di un decada atras (2015-2016), a manda carta y notifica diferente ministernan di e tempo ey pa busca un solucion pa e situacion aki, pero nada definitivo a wordo implementa pa frena e crecemento di e debe.
E sector di cuido medico ta confronta un dilema structural cu ta pone presion riba e recursonan di e pais:
Obligacion humanitario y tratadonan internacional: Aruba ta mará na tratadonan di Nacionnan Uni (firma pa Reino Hulandes) cu ta obliga e pais pa duna atencion medico di emergencia na tur persona cu yega na poli, ImSan, of hospital. Sinembargo unda e derecho di tur e cuidadonan cu ta paga ta keda ? Un persona sea un turista cu un atake di curason of un persona den situacion ilegal no por wordo rechasa ni laga sin atencion na porta di hospital paso Aruba tin un tratado firma, pero e derecho di tur e aseguradonan cu ta paga un suma y cu si ta cumpli cu nan debernan ,unda e derecho ey ta keda di no lo paga debi na iresponsabilidad di otro actonan ilegal? A notifica derechonan Humano?, a traha un plan riba e inhusticia y abuso aki ?
E carga pa e pueblo: Di otro banda, e gasto non-cubri aki ta wordo hiba pa e pueblo di Aruba. E pregunta crucial ta keda con por balansa e derechonan humano basico cu e proteccion di e recursonan di e pais, evitando abuso caminda personanan di afo ta haci uzo di e sistema sin contribui na dje.
Segun parlamentario gino Goeloe pa frena e crecemento continuo di e debe aki, tin convocacionnan andando entre e actornan clave di e sector y e altisimo nivel gubernamental:
Participantenan: E Raad van Toezicht y Raad van Bestuur di hospital ta reuniendo activamente cu Minister di Salud, Minister di Finanzas, y e Prome Minister.
E meta principal ta pa busca un structura legal of un sistema nobo cu ta garantisa atencion humanitario, sin cu e sistema di salud y e pueblo di Aruba tin cu keda carga e gasto financiero aki sin un mecanismo di cobramento of compensacion fiho.