Durante un reciente intercambio di idea entre diferente actor clave den e sector di salud y turismo, a presenta un serie di proposicion enfoca riba fortalece e finanzas publico, mehora e cobranza institucional y establece un supervision mas estricto den e proteccion di recurso sanitario di e isla.
Entre e puntonan di mas relevante, a haci un yamando pa atende directamente e retonan financiero cu ta wordo genera pa e atencion medico di emergencia di turistanan, e control di Inmigracion y e responsabilidad di e altisimo mando hospitalario, segun parlamentario Gino Goeloe
Implementacion di un ‘Health Fee’ pa Turista
Un di e proposicionnan mas destaca pa alivia e carga financiero di e sistema di salud ta e introduccion di un fee of contribucion special di salud pa e bishitantenan cu ta drenta Aruba, un modelo cu ya ta wordo aplica den otro destinacionnan turistico regional (manera Republica Dominicana).
Creacion di un Fondo Special: E entrada genera pa e tarifa aki lo bay directamente pa un fondo dedica na cubri e gastonan di hospital ora bishitantenan sin seguro valido di biahe mester di atencion di emergencia.
Control di Migracion y Entrada Ilegal: A señala cu e gastonan no-recuperabel ta wordo afecta tambe pa e entrada di personanan status ilegal via e aeropuerto of botonan chikito. A enfatisa cu, paralelo na e fondo special, mester fortalece e mehoramento di e control di frontera.
Mayor Supervision y Control den Maneho di Hospital
Un otro punto crucial cu a wordo debati ta e mester di di haci e cambionan den maneho di hospital mas constructivo y transparente. A subraya cu e esfuersonan di gobierno y e direccion actual mester traduci den mehoracionnan visibel y structura pa e institucion y e pashentnan.
Rol Clave di e Hunta di Supervision (Raad van Toezicht): A enfatisa e responsabilidad di e Hunta di Supervision pa eherce un control mas estricto y continuo riba e Hunta di Maneho (Raad van Bestuur).
Rendicion di Cuenta: E proposicion ta stipula cu e Hunta di Supervision mester tene ambos director tanto esun encarga cu e parti medico como esun encarga cu e parti financiero mas bao di control y exigi cu nan ta rindi cuenta di manera transparente pa garantisa e bon funcionamento di e hospital.
E dialogonan aki ta necesario y ta resalta e mester pa accionnan concreto cu ta balansa e crecemento turistico cu e sostenibilidad di e infrastructura di salud na Aruba. E combinacion di un mecanismo financiero pa turistanan y un cobranza hospitalario mas streng ta representa un paso esencial pa protege e recursonan publico y eleva e calidad di servicio medico den e pais.