E dia y e ora ningun hende no sa, pero mescos cu e cunukero ta ripara ta tempo di cosecha , asina tur esnan cu ta kere den Cristo ta nota den e senjalnan, den acontesimento mundial, den movecion di naturalesa y den tur locual cu Cristo Hesus a bisa y ta para scirbi den Mateo 24, cu e tempo ta asercando.
Tin hopi hende tin miedo di tur locual ta pasando, pasobra ningun caminda ta safe di locual Dios su palabra ta bisa , pasobra locual ta para scirbi lo bini riba mundo completo manera ta para scirbi den Lucas 21:34-36.
Te ainda e harido no kier stop di hari, ni e cherchado no kier stop di chercha, tampoco esnan cu ta rechasa Cristo Hesus , nan curason no kier cambia, y nan curason y pensamento cada dia ta aleha mas for di su palabra, buscando y sirbiendo diosnan falso cu no ta existi ni tampoco por duna salbacion.
Manera ta para scirbi cu esnan cu ta kere den Cristo Hesus lo wordo persigi, pasobra nan kier biba un bida cu ta agrada Dios, den santidad, y den pas, y asina cumpli cu e propostito di Dios den nan bida.
Laga nos habri nos wowo bon cla, y sigi perservera, pasobra ta cosnan grandi ta na caminda, laga nos pidi Dios pa habri porta, pa e evangelio di Dios por alcansa tur caminda, manera e gran comision ta manda nos.
Laga tur hende samina nan mes, ya cu nos no por husga otro, pero nos mester anuncia na tur hende , aunke pa hopi e zona duro e palabranan cu ta para scirbi den Juan 3:36 bisando:
Esun cu ta kere den e Yiu tin bida eterno, ma esun cu no obedece e Yiu lo no mira bida, ma e furia di Dios lo keda riba dje.
Kico ta nifica e furia di Dios lo keda riba hende?
Awel den Juan 3:16-18 e ta splica nos cu esun cu no kere lo ta condena, pasobra e no a kere den e Yiu unigenito di Dios. Caminda tin condenacion eynan e furia di Dios lo ta.
Den Romanonan 2:5 e palabra ta bolbe splica con hende pa motibo di nan capricho y nan curason cu no kier arepenti, ta montona furia di Dios pa nan mes, den e dia di furia y huicio di Dios.
Y splicando mas cla ainda , nos tur por comprende , cu Dios a stima mundo asina tanto cu e kier duna tur hende un chens pa drenta cielo, cu ta solamento door di kere y biba pa su Yiu Cristo Hesus.
E tempo ta birando cortico , nos no sa cuanto tempo mas nos tin, e mundo ta birando cayente, esey ta un di e senjalnan cu ta demostra mas cla locual ta para scirbi den 2 Pedro 3:7.
E promesa den Juan 14:1-4 ta pa nos no tin miedo, pa nos kere den Dios, y kere den Cristo Hesus manera ta para scirbi, cu E lo bay , y drecha lugar pa nos y despues bin bek bin busca nos pa caminda E ta nos tambe por ta.
Tene bon cuenta cu locual ta para scirbi de 1 Thesalonisensenan 4:16-18.
Tempo trabahoso, caminda ciencia y technologia ta aumentando, y mas y mas hende ta desvia , poniendo nan atencion y dedicacion na loke ta terenal y keda sin su busca locual ta eterno, cual ta e salbacion cu Cristo Hesus so por ofrece.
E ladron ta bini solamente pa horta, pa mata y pa destrui. Cristo Hesus ta duna bida eterna.
Pastor Marcel Balootje.