Parlamentario di fraccion di MEP y ex-minister di Husticia, Rocco Tjon, a expresa su profundo preocupacion pa e situacion actual den e sector hudicial na Aruba. Segun Tjon, e decisionnan di e actual gobierno pa corta den e presupuesto di husticia ta poniendo e siguridad di e pais y di e propio agentenan policial den gran peligro.
Tjon a señala cu algun luna pasa Ministerio Publico a bati alarma pa medio di un carta oficial. Den e documento aki, e entidad a adverti cu e recorte di 10% cu e gobierno aki a aplica riba nan presupuesto di trabou ta conduciendo na e hecho cu diferente caso di investigacion no por wordo ehecuta mas.
Radarnan for di servicio
Un di e puntonan mas critico cu Tjon a trece dilanti ta e estado di e radarnan na Aruba, cu pa varios luna caba ta completamente for di operacion.
2014: E mesun Minister Dowers di e tempo ey a desmantela y laga e radarnan bay perdi.
2018: Bou di maneho di ex-minister Bikker a reintroduci e sistema di radar.
Maneho di Tjon: Durante su periodo como minister, Tjon a percura pa conecta e sobrante radarnan y a adkiri un di cuater radar, cu te awe no a wordo instala.
Tjon a recorda cu na aña 2025, ora e actual gobierno tabata sinta caba, e Comision di Husticia di Parlamento formá pa fraccionnan di AVP, Futuro, PPA y MEP a bishita e Operation Command Center na Savaneta. Den e ocasion ey, Cuerpo Policial a duna un demostracion y splicacion detaya di e balor agrega cu e radarnan aki tin pa e siguridad nacional y e proteccion di e mesun polisnan. Na e momento ey e radarnan tabata funciona, mientras cu awe nan ta paralisa.
Sin fondo pa mantencion y falta di contesta
E proyecto di radar a costa Pais Aruba miyonnan di florin. Tjon a subraya cu den e gobernacion anterior a percura pa tur e licencianan y e mantencion necesario tabata na ordo. Sinembargo, e recortenan presupuestario actual a laga e sistema sin fondo pa mantene e radarnan operacional.
Segun informacion cu e parlamentario a ricibi, Cuerpo Policial tin lunanan largo ta manda peticion oficial na e minister pa soluciona e problema aki, pero e mandatario no ta duna .
Tjon a conclui advertindo cu e falta di vision y e recortenan aki ta trece consecuencianan serio pa e control di nos costanan y siguridad di e pueblo di Aruba.
