Durante transcurso di siman pasa, Fundacion COMPA a ricibi un invitacion oficial di parti di e oficina ministerial pa un reunion di trabou cu Minister Herde, e cual a tuma luga diabierna ultimo 16 di october. E encuentro aki ta sigui riba e declaracionnan cu e mandatario a haci desde dia 21 di juli ultimo riba Hit 100, unda a priminti cu lo drenta den dialogo cu e organisacion.
E motibo principal pa e reunion aki cu e mandatario encarga cu Asunto Interior tabata e reaccion riba e diferente proyecto- y actividadnan di gobierno, hunto cu e preocupacionnan y puntonan di urgencia cu ta biba den comunidad. Entre e preocupacionnan principal cu a wordo presenta, ta e falta di personal y e atraso structural den diferente departamento publico, e estado di e infrastructura di caminda cu ta presenta kilometernan di atraso den mantencion, y e necesidad urgente pa atende e situacion desesperante cu hopi famia ta enfrentando pa loke ta trata vivienda.
Durante e deliberacion, e mandatario a expresa su frustracion pa e falta di capacidad pa logra tur e ambicionnan estableci na un ritmo mas rapido. Sinembargo, tur dos partido a remarca cu tin hopi “common ground” y punto di coincidencia pa loke ta trata e solucionnan necesario pa e pais.
Mercado di vivienda y cumplimento di ley
Den prome luga, tanto Fundacion COMPA como Minister Herde a duna di conoce cu mientras cu mester atende cu e mercado di vivienda na Aruba di manera prioritario y urgente. COMPA a enfatisa cu e maneho di vivienda mester faborece e residente local en prome luga, un posicion cu e minister a apoya completamente.
Den e mesun contexto, e fundacion a subraya e importancia di aplica y haci cumpli (handhaaf) e leynan existente, entre cual e maneho di Erfpacht, e regulacion di Airbnbs, y e Ruimtelijk Ontwikkelingsplan met Voorschriften (ROPV). E organisacion a recorda cu e ROPV no ta permiti e creacion di Airbnb nobo desde hopi aña caba, haciendo puramente un cuestion di echos y control di ley. Fundacion COMPA a felicita e minister pa e medidanan cu a cuminsa wordo tuma, indicando cu maske kisas lo mester implementa medidanan mas firme ainda, e pasonan actual lo trece un alivio berdadero. Segun COMPA, e raiz di e solucion pa e crisis di vivienda ta resida den un maneho capas y transparente di erfpacht di parti di gobierno.
Segun Aron Beslip di CONPA Minister Herde a indica durante e reunion cu gobierno mester haci uzo di tur instrumento legal posibel pa mantene y garantisa e calidad di e proyectonan na Aruba, ademas di stipula un responsabilidad estricto pa sigura cu tur proyecto ta wordo ehecuta manera debe ser.
Un otro punto di acuerdo fundamental tabata e stimulacion di inversion di parti di e fondonan di pension local. COMPA y e mandatario ta coincidi cu ora e fondonan di pension inverti den real estate (vastgoed) y den desaroyo local, e ganashinan ta bay bek directamente pa e pensionadonan mes, filiando simultaneamente e mercado di vivienda y fortificando e economia di e isla.
Por ultimo, Fundacion COMPA a trece dilanti e tema di prioridad , marcando esaki como uno di e raisnan principal di e problema socioeconomico actual cu ta afecta e accesibilidad di cas pa e ciudadano comun na Aruba.