Na principio di december Stichting Monumentenfonds Aruba a anuncia cu e piso abou di e monumento di Botica Aruba lo keda converti den un restaurant bou di e nomber di KOAL pa cual a inicia cu e trabounan di renobacion di e interior di e edificio di Steenweg 19.
Awe cu orguyo nos ta anuncia cu tin un huurdo nobo pa e prome piso. Dia 21 di december e directiva di Stichting Monumentenfonds Aruba a firma e acuerdo di huur cu Cocolishi Studios. Awor lo traha hunto cu nan pa e renobacion di e interior di e edificio.
Redestina un monumento ta un di e retonan mas grandi ora ta trata un proyecto di restauracion. Den e caso di Botica Aruba, e prome piso tin un entrada separa pa cual a logra haya dos funcion diferente pa e edificio cu ta combina bon cu otro.
E edificio na Steenweg, ta un monumento proteha cu a keda construi na 1925 pa Addison Winfield Croes. Hunto cu Gustave Nouel a cuminsa un di e prome boticanan riba e isla bou di e nomber di Botica Aruba na aña trinticinco. E piso di ariba a fungi como vivienda y den añanan ochenta a keda converti den tienda di Palais Hindu na aña 1993. Pa hopi aña conoci bou di e nomber di ‘El Mercado’. Despues cu ‘El Mercado’ a cera su portanan e edificio a keda bashi te na 2015 ora cu Stichting Monumentenfonds Aruba a cumpra e edificio. Entre 2016 y 2019 BEAM a haci uzo di e edificio como un Atelier di arte. Na 2020 a inicia cu e proyecto di restauracion di e exterior.
Durante e restauracion a hiba e edificio bek na su forma original
den cual el a keda construi den añanan binti. Un monumento cu hopi detaye y decoracion cu a keda descubri durante e proyecto. Nos a logra restaura tur esakinan, habri e balcon di e edificio bek y trece bek e decoracionnan den estilo ‘gingerbread’ tanto na e bentananan como na e balcon.
Den e forma aki Stichting Monumentenfonds Aruba por garantisa cu e monumento di Steenweg lo tey pa futuro generacionnan por conoce tambe e historia di Botica Aruba.
A firma acuerdo di huur cu Cocolishi Studios
