Prome Minister Mike Eman a tene un reunion productivo y constructivo cu Tisa LaSorte, CEO di Aruba Hotel and Tourism Association (AHATA), den preparacion pa un dialogo amplio y transparente riba e futuro di turismo na Aruba.
Durante e reunion, LaSorte a presenta e prioridadnan strategico di AHATA, incluyendo sugerencianan pa mehoracion di e economia, e structura operativo di e sector hotelero, y e necesidad pa mehora cumplimento fiscal pa Short Vacation Rentals.
Prome Minister Eman a comparti e vision di Gabinete AVP-Futuro, cual ta pone enfasis riba un turismo cu ta inclusivo, sostentibel y beneficioso pa henter comunidad. Tin preocupacion legitimo relaciona cu e nivel di impacto ambiental y e falta di balansa den e crecemento turistico durante e decadanan cu a transcuri.
Despues cu refineria LAGO a cera su portanan den añanan ochenta, Aruba a busca alternativa economico y a habri e porta pa desaroyo turistico sin mucho regulacion. E resultado awe ta un desaroyo for di balansa. Pa Gabinete AVP-Futuro, e meta no ta pa stop crecemento, sino canalisa e desaroyo den un forma cu ta responsabel, sostenibel y duradero.
Gobierno ta trahando riba un maneho nobo pa turismo: un modelo cu ta proteha nos naturalesa, fortifica nos comunidad y sigui stimula productividad. E reunion cu AHATA ta un paso mas den e esfuerso di alineacion cu e sector priva, pa logra un turismo den cual nos pueblo por comparti e exito y cu nos isla por sostene.