Lider di partido movimiento electoral di pueblo (MEP), Evelyn Wever Croes:
Sra Evelyn Wever-Croes, Lider di partido MEP a expresa di ta mira cu aña 2023 ta bay ta un aña cu lo trece cosnan bon pa partido MEP y pa henter comunidad di Aruba. Den cuadro di campaña 2025, a cuminsa cu preparacionnan, na unda ta ofreciendo cursonan pa tur esnan interesa pa forma parti di e prestigioso partido Movimiento Electoral di Pueblo (MEP). Tambe ta trahando riba diferente actividadnan pa eleccion 2025. Manera a wordo indica den varios conferencia di prensa, aña 2023 a wordo decreta como aña di Union y Positivismo y un aña cu lo trece progreso y bienestar pa henter comunidad.
Lider di partido MEP a tuma nota cu oponentenan a habri aña riba un pia mas negativo, cu e spreransa cu gobierno lo cay pa asina por bin un eleccion di nobo. E pregunta cu sra Wever-Croes tin ta; si esaki ta deseo di oponentenan, kico ta loke a nan di oposicion tin pa ofrece comunidad en bes di critica y negativismo?
Ta di admiti cu desde cu e gobierno aki, cu MEP den gobierno, a sa di goberna e pais aki den bon tempo, den mal tempo, den hopi mal tempo y awor atrobe den tempo cu ta birando miho.
E vision di partido MEP ta pa e ser humano ta central y cu tin progreso y bienestar pa cada un di e ciudadanonan cu ta biba aki na Aruba. Pa cu esaki, partido MEP lo sigui traha riba crea posibilidadnan y cosnan positivo pa Aruba.
“Ora oponentenan bisabo nan kier pa bin elecion, nan kier pa gobierno cay y nan kier pa cambia gobierno, djis puntra nan: Kico abo como oposicion tin di ofrece? Kico ta e perspectiva cu abo ta brinda na pais Aruba?” Prome Minister a termina bisando.