Aruba Airport Authority N.V. (AAA) conhuntamente cu Aruba Tourism Authority (A.T.A.), ta anuncia cu GOL Linhas Aéreas lo conlcui su servicio programa non-stop entre Brasil y Aruba, e ultimo vuelo directo di e aerolinea lo ta den luna di october 2026.
Desde cu a lansa e servicio pa Aruba, GOL a hunga un rol importante den e fortificacion di conectividad aereo entre Aruba y Brasil, brindando e biaheronan opcionnan di biahe adicional mientras ta sostene e diversificacion di e mercadonan di bishitante di Aruba. AAA, A.T.A. conhuntamente cu Ministerio di Turismo ta extende nan sincero aprecio na GOL pa nan asociacion, colaboracion y contribucion valioso na e conectividad aereo di Aruba durante e añanan.
Segun GOL, e decision ta forma parti di e strategia comercial mas amplio di e compania di aviacion y ta basa riba consideracionnan di mercado y sostenibilidad operacional y financiero di e compania a largo plaso. E desicion no ta disminui e partnership fuerte cu a construi entre GOL y Aruba durante e añanan.
Brasil ta keda un mercado di fuente strategico pa Aruba. Como parti di e strategia di diversificacion turistico di e isla, Aruba a haci esfuersonan significativo pa fortifica su presencia na Brasil pa medio di mercadeo di destinacion, partnership strategico y e desaroyo di conectividad aereo sostenibel. E mercado di Brasil ta sigui representa un oportunidad importante pa e destinacion, particularmente mirando su potencial fuerte pa atrae e bishitantenan di balor halto.
Mientras cu servicio directo di GOL lo conclui na october 2026, e biaheronan lo sigui tin acceso na Aruba a traves di un variedad di ruta di conexion. E vuelonan for di São Paulo (GRU) pa Aruba ta sigui disponibel pa reserva a traves di e aerolineanan asocia cu GOL y diferente compania aereo tambe ta ofrece conectividad conveniente entre Brasil y Aruba.
Como parti di un vision a largo plaso, e companianan ta mantene firme nan compromiso cu e mercado Brasilero y lo sigui traha cu e aerolineanan asocia y stakeholders pa fortalece e conectividad entre Brasil y Aruba, incluyendo e buskeda di oportunidadnan pa reestablece e servicio aereo directo den futuro.
Ta curasha e biaheronan cu ta buscando e ultimo orarionan di vuelo y opcionnan di biahe disponibel pa bishita nan aerolinea of agencia di biahe preferi pa obtene informacion mas actualisa riba e opcionnan di itinerario.