Durante un ceremonia special na Princess Wilhelmina Park, comunidad Filipino na Aruba a conmemora e 128 aniversario di independencia di Filipinas, den presencia di Prome Minister Mike Eman, Minister Rene Herdé, Minister Mervin Wyatt-Ras, Minister Wendrick Cicilia, representante di Parlamento, Cuerpo Consular, autoridadnan local, comunidad Filipino y otro invitadonan.
E programa a inclui hisamento di bandera di Aruba y Filipinas, interpretacion di e himnonan nacional “Aruba Dushi Tera” y “Lupang Hinirang”, ceremonia di entrega di flor, mensahe spiritual, discurso oficial, presentacionnan cultural, coronacion di beauty queens y reconocementonan special.
Den su discurso, Prome Minister Mike Eman a expresa, den nomber di Gobierno y pueblo di Aruba, profundo aprecio pa e comunidad Filipino y su contribucion valioso na nos sociedad.
Eman a indica cu e celebracion di independencia a tuma luga den un momento di sentimento mixto, recordando tambe e reciente perdida di miembronan stima di comunidad Filipino. Segun e Prome Minister, momentonan asina ta recorda nos con fragil bida ta, pero tambe con importante ta pa busca significado, fe y proposito den nos existencia.
Prome Minister Eman a describi e pueblo Filipino como un inspiracion pa mundo, destacando con un nacion forma pa hopi isla ta logra mantene un sentido comun di destino, identidad y proposito.
Eman a expresa gratitud special na comunidad Filipino na Aruba pa e forma sincero cu nan a integra den sociedad Arubiano. El a destaca nan contribucion den sector di salud, caminda hopi enfermero y profesional Filipino ta brinda cuido, consuelo y speransa na momentonan dificil pa famianan Arubiano.
Tambe el a menciona e rol importante cu comunidad Filipino ta hunga den sector di hospitalidad, contribuyendo diariamente na exito di turismo di Aruba, y den otro sector di economia y comunidad, incluyendo emprendemento, innovacion y servicio.
Un momento special den su discurso tabata e aprecio pa e interpretacion di “Aruba Dushi Tera” door di miembronan di comunidad Filipino, cual segun Eman tabata un demostracion conmovedor di nan amor y respet pa Aruba.
Prome Minister Eman a rindi reconocemento na Honorary Consul General Ami Henriquez-Mendez pa su liderazgo, amor y dedicacion pa comunidad Filipino na Aruba.
Na final di su mensahe, Eman a enfatisa cu comunidad Filipino a bira parti integral di e esencia social di Aruba. Segun Eman, e Fe, solidaridad, talento y calor humano di e comunidad Filipino ta yuda construi un Aruba mas fuerte.
“Nos ta stima boso, nos ta aprecia boso y nos ta sigui construi futuro di Aruba hunto,” asina Prome Minister Mike Eman a expresa.
E celebracion a forma un momento di union, gratitud y reconocemento pa e lasonan fuerte entre Aruba y comunidad Filipino, reafirmando e importancia di convivencia, respet y contribucion mutuo den nos sociedad multicultural.
