Sintonisa e podcast tur diaranson anochi via Facebook, TeleAruba, y djei “on demand”
Oficina di Turismo ta contento pa anuncia cu e di dos temporada di nan podcast “A.T.A. Talks About” lo debuta diaranson awo, 18 di october 2023. Durante e prome temporada, a pone hopi enfasis riba A.T.A. como organisacion. A pone atencion riba e responsabilidadnan y trabounan primordial y a cera conoci cu e personanan cu ta eherce e trabou. Tambe por corda cu a trata varios mito cu ta / lo por a bin dilanti den comunidad tocante A.T.A. E reaccion di comunidad tabata sumamente positivo pa cu e podcast. Pa e motiboo aki A.T.A. a dicidi di continua cu e podcast pa un segundo temporada, continuando asina ki cu e meta di informa comunidad debidamente.
E di dos temporada di “A.T.A. Talks About”, lo conta cu un total di 12 episodio. Como invitado, lo tin diferente socionan local, caminda lo combersa abiertamente di temanan cu ta relevante pa e industria di turismo. Ta trata di temanan manera: turismo eco-consciente, mercado laboral y educacion, seguridad, niche marketing y desaroyonan riba nivel local y internacional pa menciona algun. Tambe lo combersa tocante e presencia remarkabel di Aruba den e mercadonan mas clave, y lo siña mas di esfuersonan di promocion na Norte America, Latino America y Europa. Lo conta cu presencia di diferente persona den comunidad y internacional cu sigur lo aporta na e temanan menciona.
E episodionan modera pa Tristan Every lo ta informativo y tin como meta pa ofrece un bista mas amplio, incluso tras di cortina, di nos industria turistico. Asina comunidad completo por ta na altura di desaroyonan den e mundo di turismo y siña mas di con nos por traha hunto pa mantene Aruba como un destinacion lider den Caribe y pa condusi e desaroyo colectivamente den e direccion desea.
A.T.A. ta invita tur hende pa sintonisa e prome episodio di e di dos temporada, cu lo ta disponibel riba Facebook di ‘Oficina di Turismo’., Sopi Mix Studio, y nos planta nacional TeleAruba diaranson pa 7or di anochi. Tur episodio lo por ser scucha y mira bek ariba Apple Podcast, Google Podcast, Spotify, y Youtube di Sopi Mix Studio.
