Tur tata di famia ta un lider, y ora un tata no ta guia su famia den caminda di Dios, e ta hiba nan na caminda di dolor y decepcion.
Tur lider cu ta den cualkier organisacion, sea deportivo,social, politico,of spiritual, mester tin respet pa Dios y no por laga nan mes wordo husa pa kita hende for di e caminda di Dios, pasobra esey ta iresponsabel.
Hende mester tin respet pa Dios, y guiando un pueblo den abominacion, y cosnan impuro, perversidad y malicia, no ta bon ehempel, pasobra ki bal la pena hende tin tur cos aki na mundo, y nan alma ta reserva pa fierno.
Pakico sostene y apoya algo cu lo trece tristesa, falta di respet y confusion den hopi famia awe, y mayan falta di identidad den nos hubentud.
Tur esaki ta e tempo trabahoso cu ta reina riba mundo henter segun 2 Timoteo 3:1-5).
Si un mucha ta for di boluntad di Dios y su mayornan ta sostene, nan ta bira complice di dje.
Si hende grandi ta bay contra boluntad di Dios,gara duro na inmoralidad ,y ta haña apoyo di esnan cu mester sa miho , esey ta produci liderazgo iresponsabel.
E rabia di Señor lo no kita, te ora cu E cumpli, completamente cu e proposito di Su curason
Den e ultimo dianan boso lo compronde esaki bon cla.( Jeremias 23:20).
Cada ken cu ta den un puesto como lider, mandatario of gobernante, mester samina su consenshi y puntra su mes, ta esaki ta e caminda cu Dios kier pa mi dirigi e pueblo?
Of mi ta haciendo cosnan pa complace cu hende sin corda riba e dia di mayan, sin temor di Dios, no teniendo cuenta cu e futuro generacion.
Ora un hende huramenta pa algo, semper locual cu e a huramenta pe, ta cay directamente bao di guia di Dios, pasobra tur ley y tur orden decente pa lanta un comunidad sano , cu norma , balor Social , Spiritual y Decensia ta bini for di Palabra di Dios.
Tur hende sa cu Moises tabata un homber recto, pero Aaron su ruman tabatin un spirito complaciente, y e tabata haci tur clase di bagamunderia basta e pueblo keda contento cune, hasta e a traha e bishe di oro, treciendo idolatria ,inmoralidad y bruheria hincando pica den pueblo y hiba nan na destrucion.
Pesey beibel ta bisa nos pa haci oracion pa esnan cu ta den liderasgo, pasobra Dios sa cu e enemigo ta loer riba nan pa asina trece confusion, desunion y inmoralidad den pueblo.
E temor di Señor ta prolonga bida,ma añanan di e malbado lo wordo haci cortico.( Proverbionan 10:27).
Pa motibo di e bendicion di e hendenan recto, e stad ta wordo halsa,ma pa medio di boca di e malbado, e ta keda trastorna.( Proverbionan 11:11).
Esnan cu ta di curason perverso ta un abominacion pa Señor, ma esnan perfecto den nan caminda ta Su delicia.( Proverbionan 11:20).
Ta masha importante pa cada tata wak den cual direccion e ta hiba su famia, sea den scuridad of den claridad divino di Dios.
Cada lider mester pensa bon prome cu e apoya algo, pasobra esun cu ta apoya hende den caminda contrali na e palabra di Dios, ta bira un piedra di trompica.
Tur lider mester tin un mente sano, y puro, yena cu temor di Dios, leu for di perversidad y malicia, ma yena cu bon conseho pa guia hende riba e caminda di Dios, cual ta hiba na bida eterna.