Aruba Trade and Industry Association (ATIA) a celebra su 80 aña di existencia cu un evento cu a rindi homenahe na e trayecto di sector priva, a stimula dialogo importante, y a ofrece un vision riba e futuro di Aruba su economia.
E celebracion a destaca ATIA su nivel di colaboracion internacional, cu oradornan strategico y institucionnan prestigioso manera e Secretario General di “International Organisation of Employers” (IOE), e Director di “International Labour Organization” (ILO) pa e region Caribe, y e Presidente di ANDI Colombia, un di e organisacionnan empresarial mas influyente den America Latino. Tambe for di Colombia, Director di “Holland House Colombia” a presenta dato y bista interesante pa empresarionan local, pa facilita comercio y inversion entre Aruba, Reino Hulandes y America Latino.
Nan participacion, sea via video of den persona, ta refleha e nivel halto di respet internacional pa ATIA su liderazgo y e importancia di ATIA su rol den promocion y defensa di comercio local.
E panel di anochi, cu a wordo modera den un estilo dinamico door di Cherryldine Buckley, a inclui expertonan local manera Dr. Ryan Peterson di Banco Central di Aruba, Hose Figaroa, Presidente di FTA, Julie Wever di FCCA, y empresario renombra y ex-presidente di ATIA, Ronald van Trigt di TOTAL.
E evento a fortifica e rol di ATIA como e conexion real entre Aruba su sector priva y e mundo empresarial no solamente local pero mundialmente. Tambe a enfatisa e necesidad urgente pa innova no solamente den Aruba su pilar economico principal, Turismo, pero tambe cuminsa explora y inverti den otro areanan economico cu lo por fortifica nos economia. Areanan identifica, no solamente pa ATIA, pero tambe e oradornan invita ta Economia di Conocemento (Knowledge Economy), uza nos habilidad multi-lingual como un bentaha competitivo. Tecnologia (avanza), Economia Blauw (lama), Economia Berde (Sostenibilidad), Economia Oraño (Creatividad). Tambe Sr. Herrick Henriquez, director di ATIA, a indica cu nos tin cu cuminsa na nos mes, y nos companianan pa esaki nan bira miho “corporate citizens”, pensando no solamente riba ganashi, pero tambe su empleadonan, stakeholders y medio ambiente.
“ATIA ta cla pa sigui cu un siguiente fase unda ta conecta talento cu empresa pa atende cu e escasez laboral, impulsa nos economia, y eleva Aruba su futuro na un nivel digno di competencia internacional, basa riba nos capacidadnan intelectual y innovativo,” segun Sr. Henriquez.
E evento a culmina cu un recepcion ameno hunto cu tur invitado special, unda ATIA a expresa su gratitud na tur organisacion cu a honra ATIA cu nan presencia durante e celebracion di 80 aña como e boz di comercio y progreso empresarial di Aruba.
