ORANJESTAD,Aruba
Arubaanse Voetbal Bond ta dal den un otro paso den e direccion cu nan a deliña pa alcansa un nivel mas halto. Ta guiando e coachnan di Academia di AVB den implementa un sistema den nan trabou diario. E coachnan a haya un curso di e programa nobo.
E coachnan por programa nan trainingnan delanta caba y por comunica cu hungadonan. Presidente di AVB, Ing. Richard Dijkhoff, a bisa cu esaki ta haci e trabou mas facil, mas miho y eficiente, pero tambe mas lihe. E sistema tin diferente modulo y un di esunnan importante ta e “Speler volgsysteem”. Via e sistema aki lo evalua hungadonan riba diferente criteria.
A base di e criterianan aki ta dicidi si e hungado a desaroya di tal forma cu e por keda den e academia. Banda di e exigencianan cu hungado mester cumpli cu ne, ta registra por ehempel comportacion y con ta bayendo na scol. Ta registra tur esaki den e sistema. Kiermen na momento cu un hungado tin tur su informacion den e sistema, por tuma cierto decisionnan por ehempel ora ta traha un seleccion. Den pasado AVB a tende cu dicon tal hungado ta den seleccion y tal hungado no, awo a base di presentacion di hungado, a base con ta cumpli cu exigencianan registra den sistema, lo scoge hungadonan pa seleccion.
E meta ta p’e coachnan di academia haya e guia aki pa na fin di Juli, comienso di Augustus, implementa e sistema aki den clubnan specialmente U-13, U-15, U-17 y U-20. E coachnan tambe lo haya acceso na e sistema aki y nan por haci uzo di e sistema den nan training. E bon ta cu tur cos ta prepara for di federacion y conhuntamente den consulta cu e clubnan y coachnan di e clubnan, lo delinea con lo hiba futbol na Aruba pa e siguiente nivel.
E curso di DotCom Sport ta un programa cu e coachnan ta warda tur informacion di e hungadonan, segun David Abdul, Coordinador di e Academia di AVB. E coachnan a haya un curso di cual nan por hinca e trainingnan aden, traha un programa, un ciclo p’e trainingnan, despues di e training por evalua esaki y tuma lista di presencia. E programa ta haci’e hopi facil, pasobra cada coach ta haya su mesun “username” y un dia adelanta por prepara e trainingnan. E hungadonan mes por mira e training tambe y tambe lo haya un acceso na e programa.
