Awe merdia a tuma lugar un asina yama regiezitting den apelacion di e casonan penal contra ex-minister di Labor P. Croes, su casa y cuatro otro sospechoso. E ex-minister a wordo condena den prome instancia na februari 2019 pa un castigo di cuatro aña pa corupcion, labamento di placa, maluso di funcion, dunamento ilegal di trabao y participacion na un organizacion criminal. E caso aki, conoci como Ibis, a start na maart 2017 cu diestres huiszoeking.
E caso Ibis a wordo treci den apelacion na fin di aña 2019, pero a wordo posponi algun biaha debi particularmente na e situacion cu Covid-19 y riba peticion di defensa di P. Croes.
Den e regiezitting di awe defensa a trece su deseonan pa dilanti pa loke ta e investigacion (onderzoekwensen). Corte Superior lo dicidi riba 23 di februari venidero tocante e onderzoekwensen aki. Una vez e deseonan di defensa pa e investigacion wordo ehecuta, lo trata e caso den su contenido. E tratamento lo tuma lugar na september 2021, asina Corte Superior a determina awe.
